“გლდანში, ლოტკინზე, სამგორში და სოფლებში გისმენენ და აგვიხსენით, გაისად ცუდ ხასიათზე ვიყოთ?” – თეა წულუკიანი კობა გვენეტაძეს

დეპუტატების წინაშე დღეს ეროვნული ბანკის პრეზიდენტი წარსდგა. კობა გვენეტაძეს დეპუტატებმა კითხვები ეროვნული ვალუტის გაუფასურებასთან დაკავშირებით დაუსვეს.

პარლამენტის განათლების, მეცნიერებისა და კულტურის კომიტეტის თავმჯდომარე თეა წულუკიანმა მას ჰკითხა, რამდენად იმედიანად უნდა იყოს საზოგადოება მომავალი წლისთვის ლართან დაკავშირებით. 

“რომ წარმოვიდგინოთ, რომ გლდანში, ლოტკინზე, სამგორში და სოფლებში ჩართულია ტელევიზორი და გისმენენ, ადამიანებს აწუხებთ რა დაემართება მომავალ წელს ლარს და ნეოფიტისთვის გასაგებ ენაზე გთხოვთ აგვიხსნათ რა დოზით შეგვიძლია ვიყოთ შეწუხებულები, ვიყოთ უიმედოდ თუ რაღაც იმედის უფლება გვაქვს. რა თქმა უნდა, არც პანდემიაა თქვენი ბრალი და არც ის, რომ ჩვენი ეკონომიკა ჯერ კიდევ ბევრად ჩამოკიდებულია ტურიზმს. ამ რეალობაში რას გვეტყვით ლართან დაკავშირებით, ვიყოთ ძალიან ცუდ ხასიათზე გაისად თუ რა ვქნათ?” – ჰკითხა თეა წულუკიანმა კობა გვენეტაძეს. 

ეროვნული ბანკის პრეზიდენტმა აღნიშნულ შეკითხვას ისე უპასუხა, რომ ახლა გლდანის, ლოტკინის, სამგორის და სოფლების მაცხოვრებლები უკვე ინფორმირებულებად უნდა ჩავთვალოთ.

კობა გვენეტაძე:

“ზომები, რომლებსაც ჩვენ კრიზისის წინ ვიღებდით, დოლარიზაციის შემცირებისკენ იყო მიმართული. ის ინტერვენციები, რომლებიც ჩვენ ეხლა გამოვიყენეთ მიმართული არის იმისკენ შევავსოთ ის დანაკლისი, რომელიც ქართულმა ეკონომიკამ წელს განიცადა ტურიზმის დანაკლისისგან,” – განაცხადა ეროვნული ბანკის პრეზიდენტმა კობა გვენეტაძემ.

სპეციალურად თეა წულუკიანისთვის “ალიასგან”, ნეოფიტის განმარტება:

ნეოფიტი neophytos

1. რაიმე რელიგიის ახალი მიმდევარი; ახლად რჯულმიღებული.
2.გადატ. რაიმე მოძღვრების, საზოგადოებრივი მოძრაობის და მისთ. ახალი მიმდევარი.

უცხო სიტყვათა ლექსიკონი, 1989

რაც შეეხება კითხვას, უნდა ვიყოთ თუ არა გაისად ცუდ ხასიათზე – პასუხგაუცემელია. მოსახლეობას თუ მოუსმენთ, გაისად კი არა, წელსაც არ ვართ კარგ ხასიათზე, ბატონებო და ქალბატონებო.