გიფიქრიათ რა ტრაგედია ტრიალებს იმ ადამიანების გულში და ოჯახში, ვისაც ახლა დელისთან არბევენ? – ნინო ჯანგირაშვილი პოლიტიკოსებს მიმართავს

ჟურნალისტი ნინო ჯანგირაშვილი სოციალური ქსელის მეშვეობით, პოლიტიკოსებს მიმართავს:

“ბოდიში პოლიტიკოსებო, ცოტა ხნით თქვენს ზეამაღლებულ მიზნებს და ყოფას უნდა მოგწყვიტოთ: ვინმეს გიფიქრიათ ამ დღეებში, რა ტრაგედია ტრიალებს იმ ადამიანების გულში და ოჯახში, ვისაც ახლა დელისთან არბევენ? ეთერში მაინც არ გინახავთ ატირებული ადამიანები? თქვენი აზრით, ასაკოვანი ქალები იმიტომ ვაჭრობენ სიცივეში ქუჩაში რომ ასე ეხალისებათ? მათი აყრა და უკანასკნელი სარჩოს წართმევა ნორმალური ამბავია ხო? თუ არ გცალიათ ამისთვის? აბა რა, საღამოს ეთერებში უნდა დასხდეთ და ჩააანალიზოთ თეორიები, როგორ უნდა წარიმართოს პოლიტიკური პროცესები, ხალხი როგორ უნდა გამოიყვანოთ ქუჩაში და ა.შ. უბედურება ის არის, რომ პოლიტიკის მთავარ ფიგურებად საკუთარი თავი მიგაჩნიათ და მართლა, გულწრფელად აღარ გესმით რისთვის ხართ პოლიტიკაში. მიგაჩნიათ, რომ ხალხი უნდა იყოს თქვენთვის და არა თქვენ ხალხისთვის. დარწმუნებული ვარ ბევრმა თქვენგანმა არც იცის, რით შეიძლება დაეხმაროს ამ ადამიანებს. ნუუუუ, გარევაჭრობა ხომ “ტეხავს“. თქვენს სნობურ სამყაროში ასეა. დარწმუნებული ვარ, თქვენს უმრავლესობას არ გააჩნია ხედვა, როგორ უნდა მოგვარდეს ამ ადამიანების პრობლემა. ისევე, როგორც სხვა უამრავი ადამიანის უამრავი პრობლემა. ხოდა, თქვენი ფასი არის 0. ვისაც სჭირდებით, იმისთვის არ ხართ და ნეტავ, ვის რაში სჭირდებით საერთოდ”, – წერს ჯანგირაშვილი “ფეისბუქის” პირად გვერდზე.

 შეგახსენებთ, რომ მერიის ზედამხვედველობის სამსახურმა დელისის მეტროს მიმდებარტე ტერიტორიაზე მყოფ გარემოვაჭრებს ტერიტორია დაატოვებინა. ადგილზე სიტყვიერი დაპირისპირება რამდენჯერმე მოხდა. მოვაჭრეები ალტერნატიულ ფართთან დაკავშირებით მათი მოთხოვნის დაკმაყოფილებას ითხოვენ