ღამის კლუბებმა მუშაობა განაახლეს, საზღვრები გაიხსნა – რა ხდება მსოფლიოში?

მსოფლიოს სხვადასხვა ქვეყანა კორონავირუსის გამო დაწესებულ შეზღუდვებს ეტაპობრივად ხსნის.

საქართველოში 23 მაისის 00:00 საათის შემდეგ საგანგებო მდგომარეობა და ე.წ. „კომენდანტის საათი“ აღარ მოქმედებს. მოიხსნა ავტომობილით 3-ზე მეტი ადამიანის გადაადგილების შეზღუდვა, გარდა ტაქსით გადაადგილებისა. გაიხსნა მაღაზიები, რომელთაც შესასვლელი ქუჩიდან აქვთ.

რა ხდება ამ მხრივ მსოფლიოში?

ჩინეთი

ჩინეთში, რომელიც კორონავირუსის ეპიცენტრად ითვლება, ღამის კლუბებმა მუშაობა განაახლეს. თუმცა, ყველაფერი ისე არ არის როგორც ძველად.

ღამის კლუბებში შესვლამდე მოქალაქეებს სიცხეს უზომავენ, ღამის კლუბების პერსონალს კი ხელთათმანებისა და პირბადის ტარება ევალება. აღსანიშნავია, რომ კლუბის ვიზიტორებს არ მოეთხოვებათ დამცავი საშუალებების ტარება. თუმცა, ბევრი მათგანი მაინც ატარებს.

ზოგიერთ დაწესებულებაში ერთჯერად ჭიქებს იყენებენ. ამასთანავე, ყველა კლუბში ხელმისაწვდომი იქნება სადეზინფექციო საშუალებები.

კარის სახელურებისა და ტუალეტების დეზინფექცია საათში ერთხელ ხდება. კლუბის დეზინფექცია კი გახსნის წინ და დახურვის შემდეგ.

საბერძნეთი

საბერძნეთში დღეს რესტორნები და კაფე-ბარები მუშაობას განაახლებენ.

დამსვენებლებისთვის გაიხსნება საბერძნეთის ყველა კუნძული. შეზღუდვა მოიხსნება იახტებით გადაადგილებაზეც. ფუნქციონირებას განაახლებენ აუზებიც. ტურისტული სეზონის გახსნას კი საბერძნეთის ხელისუფლება 15 ივნისიდან აპირებს.

იტალია

იტალიამ საზღვრების გახსნის გადაწყვეტილება მიიღო. იტალიის ტრანსპორტის მინისტრის, პაოლა დე მიშელეს განცხადებით, იტალიის ყველა აეროპორტი ტურისტებს 3 ივნისიდან მიიღებს.

„3 ივნისიდან შესაძლებელი იქნება ყველა აეროპორტის გახსნა, მაშინ როდესაც უკვე დაშვებული იქნება რეგიონული და საერთაშორისო გადაზიდვები.

საზოგადოებრივ ტრანსპორტზე შეზღუდვები მოიხსნება“,- განაცხადა მინისტრმა. შეგახსენებთ, რომ იტალიამ ფრენები 14 მარტს შეწყვიტა.

ესპანეთი

საზღვრების გახსნის გადაწყვეტილება ესპანეთმაც მიიღო. ქვეყანა ტურისტების მიღებას ივლისიდან დაიწყებს. შესაბამისი განცხადება ქვეყნის ტურიზმის მინისტრმა, რეიეს მაროტომ გააკეთა.

უკრაინა

დღეიდან კიევსა და ხარკოვში მეტრომ მუშაობა განაახლა.

ახალი ზელანდია

ახალ ზელანდიაში 100-მდე ადამიანის შეკრება მომავალი კვირიდან დასაშვები იქნება,- ამის შესახებ ქვეყნის პრემიერ-მინისტრმა, ჯასინდა არდერნმა განაცხადა.

ქვეყანაში შესაძლებელი გახდება რელიგიური რიტუალების აღდგენა, თუმცა კვლავ ძალაში რჩება სოციალური დისტანციის დაცვა.

პრაიმტაიმი