“გეშინიათ, რომ ქვეყნის მოქალაქეებს მიეცემათ საშუალება, პირდაპირი შედარება მოახდინონ ჩემს, საქმის გამკეთებელ გუნდსა და თქვენს, ფულს დახარბებულ გუნდს შორის” – ვაშაძე პრემიერ გახარიას

„სტრატეგია აღმაშენებლის“ ლიდერი გიორგი ვაშაძე პრემიერ გახარიას 15 ოქტომბერს დაანონსებულ დებატებს ახსენებს და მიმართავს, გამოიჩინოს გამბედაობა და ოპოზიციასთან პირისპირ შეხვედრას არ გაექცეს. ამასთან, ვაშაძე გახარიას ურჩევს, არ დაემალოს მოსახლეობას, თუ ლიდერია მივიდეს და გამართოს საჯარო დებატები მასთან ისე, როგორც ამას დემოკრატი ლიდერები აკეთებენ მთელს მსოფლიოში. 

“პრემიერ გახარიასთან დებატებში, რომელიც დანიშნულია 15 ოქტომბერს და გადაიცემა საზოგადოებრივი ტელევიზიით, პრემიერ-მინისტრს  ფაქტებს და რეალობას დავუპირისპირებ, არ მივცემ შესაძლებლობას, რომ თავი დაიძვრინოს ქართული ოცნების დაიპრებული ტყუილებისგან. როგორც აღმოჩნდა, მან ეს იცის და ამიტომაც ცდილობს, გაექცეს ჩემთან პირისპირ შეხვედრას. შესაბამისად, არ გაგვკვირვებია, მაგრამ მაინც მიუღებელია, რომ გახარია აშკარად თავს არიდებს საჯარო დებატებს, როგორც ეს მისმა პარტიამ უკვე დააანონსა. თუმცა, მას, პირადად, ჯერ უარი არ განუცხადებია საჯაროდ. ასე რომ, ბატონო გახარია გადაწყვიტეთ, ლიდერი თუ ხართ, ოპოზიციასთნ დებატებს არ უნდა გაურბოდეთ. საკუთარი მიღწევებისა და დაპირებების თუ გჯერათ, წესით, უნდა გინდოდეთ მათი საჯაროდ წარდგენა. ლიდერებს სიმართლის არ ეშინიათ. მათ არ ეშინიათ არც ოპოზიციის. ასე რომ, ბატონო გახარია, შემომიერთდებით დებატებში? თუ გეშინიათ, რომ ფარდას ავხსნი დამსხვრეულ ოცნებებს, იმ ტყუილ დაპირებებს, რომელიც ხალხს თქვენ შესთავაზეთ, ან გეშინიათ, რომ თქვენს ტყუილებსა და უმოქმედობას გამოვააშკარავებ? იმის ხომ არ გეშინიათ, რომ ქვეყნის მოქალაქეებს მიეცემათ საშუალება, პირდაპირი შედარება მოახდინონ თქვენსა და ჩემს შორის, ჩემს, საქმის გამკეთებელ გუნდსა და თქვენს, ფულს დახარბებულ გუნდს შორის, ჩვენს კონკრეტულ, ქვეყნის განვითარების გეგმასა და თქვენს, ცარიელ დაპირებებს შორის? დიახ, მე თქვენ საქართველოში არსებულ რეალობას დაგიპირისპირებთ – დაგისვამთ კითხვებს: რატომ უნდა იცხოვროს ქვეყნის მილიონზე მეტმა მოქალაქემ უკიდურეს სიღარიბეში? რატომ დაკარგა 220 000-მა ქართველმა სამუშაო ადგილი და თქვენ ეს არც კი გაღელვებთ? მე შეგეკითხებით, სად არის ის 5-მილიარდიანი საერთაშორისო დახმარება და რატომ მიიღო აქედან ფული მხოლოდ თქვენმა ახლობლებმა და თქვენი პარტიის შემომწირველებმა. მე დაგიპირისპირებთ ფაქტს, რომ კრიმინალური შემთხვევები, გასული 4 წლის განმავლობაში, გაორმაგდა და 40 000 დამნაშავე, ჯერ კიდევ შარშან თავისუფლად დადიოდა ჩვენს ქუჩებში. გეშინიათ ამ ფაქტების? გეშინიათ ასეთი რეალობის? თუ გეშინიათ, მაშინ დაემალეთ მოსახლეობას და თუ ლიდერი ხართ, მოდით და გამართეთ დებატები ჩემთან ისე, როგორც ამას დემოკრატი ლიდერები აკეთებენ მთელს მსოფლიოში. მე მზად ვარ და გელოდებით. თქვენ? ბატონო გახარია? ჯერი თქვენზეა, გადაწყვიტეთ,” – განაცხადა გიორგი ვაშაძემ.