გერმანიაში დაიწყო კორონავირუსის საწინააღმდეგო ვაქცინაცია. Bild-ის თანახმად, ქვეყანაში პირველი ვაქცინა მიიღო, საქსონია-ანჰალტის ჰალბერშტადტის მოხუცთა თავშესაფარში მცხოვრებმა 101 წლის ქალმა.
საერთო ჯამში, მოხუცთა თავშესაფარში 59 რეზიდენტიდან 40-ს ჩაუტარდა ვაქცინაცია, ასევე ათ თანამშრომელსა და ცენტრის გენერალურ დირექტორს.
ეს არის BioNTech-ისა და Pfizer-ის მიერ შემუშავებული ვაქცინა. გერმანიის მთავრობის გეგმის თანახმად, მასობრივი ვაქცინაცია 27 დეკემბერს, დღეს დაიწყო.
პირველ რიგში, ვაქცინას მიიღებენ 80 წელს გადაცილებული ადამიანები, მოხუცთა თავშესაფრების თანამშრომლები, ასევე ექიმები – ამბულატორიული მომსახურებების, რეანიმაციული განყოფილებების და გადაუდებელი დახმარების თანამშრომლები.
“ამ წლის ბოლოსთვის 1.3 მილიონზე მეტი დოზა ვაქცინა გადაეცემა ფედერალურ შტატებს”, – თქვა გერმანიის ჯანდაცვის მინისტრმა იენს სპანმა.
კვირას, დღეს ვაქცინაცია დაიწყო ევროკავშირის სხვა ქვეყნებში. საერთო ჯამში, ევროპის ქვეყნები მიიღებენ დაახლოებით 4,1 მილიონ დოზას.
კომენტარები