ოჯახის წევრები მეორე დღეა ეძებენ გარემოს ეროვნული სააგენტოს უფროსის ყოფილ მოადგილეს, ეკონომისტ რამაზ გერლიანს. ოჯახი არ გამორიცხავს, რომ მისი გაუჩინარება შეიძლება ოციალური ქსელებით გავრცელებულ განცხადებას უკავშირდებოდეს, რომელიც პოლიციელთან შელაპარაკებაზე გვიამბობდა.
გაუჩინარებული რამაზ გერლიანის დის თქმით, პოლიციელი, რომელიც გერლიანს ემუქრებოდა, მის ყოფილ მეუღლეს აშანტაჟებდა. როგორც ნანა გერლიანი ამბობს, რამაზ გერლიანის ყოფილი მეუღლე “ზოგჯერ ამბობდა, რომ პოლიციელს არ იცნობდა, ზოგჯერ კი ამბობდა, რომ ის მისი მეგობარი იყო”.
”ყოფილი მეუღლე ზოგჯერ გვეუბნებოდა, რომ ეს იყო მისი მეგობარი, ზოგჯერ კი კატეგორიულად ამბობდა, რომ არ იცნობდა. ყოფილი მეუღლე არაფერ შუაშია ის გამოყენებულია, მან არაფერი იცის, შანტაჟის მსხვერპლია”,-თქვა ნანა გერლიანმა.
გუშინ, 19 დეკემბერს რამაზ გერლიანმა სოციალურ ქსელში დაწერა, რომ პოლიციელმა მისი ყოფილი ოჯახის წევრის (სავარაუდოდ გულისხმობს ყოფილ მეუღლეს – რ.თ) “დავერბოვკებით” მის სახლში შეღწევა მოახერხა.
“ამ ნაგავმა “პოლიციელმა” ჩემივე ყოფილი ოჯახის წევრის დავერბოვკებითა და გამოყენებით მოახერხა, ჩემს კერძო საკუთრებაში, ჩემს სამუშაო და ჩემი შვილების სამყოფელ სივრცეში ვირთხასავით შემოღწევა…
14 ნოემბერს შეიარაღებული დამხვდა ჩემს ბინაში თავხედურად ცრუ მოტივით დაკითხვა მომიწყო, მომაყენა შეურაცხყოფა… განადგურებული ვარ”, – წერდა ის და ვარაუდობდა, რომ აღნიშნული პირი მის შესახებ ინფორმაციას აგროვებდა და ყიდდა [16:00 საათის მონაცემებით, ეს პოსტი აღარ იძებნება. მიზეზი უცნობია].
რამაზ გერლიანს სამართალდამცველები ამ დრომდე ეძებენ.
კომენტარები