“გაყალბების ნოუ-ჰაუ” – ბაჩანა შენგელია ოპოზიციას აფრთხილებს და ახალ სქემაზე საუბრობს

გარდაცვლილი ია კერძაიას შვილი, ბაჩანა შენგელია, “ტვ პირველთან” ამბობს:

“ზუსტად ვიცი, რას გრძნობენ, როდესაც არ უნდათ წავიდნენ ქართული ოცნების აქტიობაზე და რამხელა რისკის ქვეშ აყენებენ საკუთარ სიცოცხლეს და ჯანმრთელობას. სამეგრელოში მობილიზება იყო გუშინდელ აქციაზე, მაგრამ დანამდვილებით ვიცი, ყველაზე ნაკლები ადამიანი სამეგრელოს რეგიონიდან ჩავიდა იმ აქციაზე, ბევრმა მათგანმა განაცხადა უარი. საფრთხე არ მოხსნილა და იმედი მაქვს, არჩევნების მერე არ ექნებათ ბერკეტი, თორემ ეცდებიან ამ ადამიანების დასჯას.

მწერენ სკოლის პედაგოგები, ბაღის პედაგოგები მწერენ… ერთ-ერთი სოფლის პედაგოგმა მომწერა, რომ მათ უთხრეს ასეთი რამ, მათ ბიულეტენებზე წვრილი ასოებით, აუცილებლად უნდა მიაწერონ საკუთარი ინიციალები, ყველა პედაგოგმა, ეს არის რაღაცა ნოუ-ჰაუ, მანამდე თუ ფოტოს გადაღებას სთხოვდნენ, ახლა ფოტოს ბოლომდე არ ენდობიან და ფოტოს და ამ ინიციალებს სთხოვენ…

არამარტო თავად დაკარგავენ სამსახურს, თუ ასე არ მოიქცევიან, ბევრს ემუქრებიან ოჯახის წევრებით და ეს ადამიანები იმდენად არიან დაშინებულნი, რომ როცა შეტყობინებს ვიღებ, პირველი რაც იქ წერია, არის, ძალიან გთხოვთ, ეს წაშალოთ. რამდენიმემ გადაწყვიტა ამაზე ღიად საუბარი, თორემ, ადგილზე ბევრად მეტია და ისინი ზეგ იქნებიან უპრეცედენტო ზეწოლის ქვეშ.

ვთხოვ კომისიის წევრებს, რომლებიც იქნებიან ზეგინდელ არჩევნებზე, კარგად დააკვირდნენ ბულეტენებს… ინიციალების და რაიმე მაიდენტიფიცირებელი ნიშნების აღნიშვნა არის კანონის მიხედვით აკრძალული, ამიტომ სთხოვენ წვრილი ასოებით დაწერას, რომ ბათილად არ ჩაითვალოს ბულეტენები.”