თამო კეშელავა, ალია
„ალიას“ ესაუბრება, მსახიობი ბესო ზანგური
– თქვენმა ადვოკატმა თქვა, აღვადგენ თეატრში აუცილებლადო, არ იქნება რთული, ამ ყველაფრის შემდეგ, თეატრში დაბრუნება? ვგულისხმობ, ბრძანების დაწერას და შენი ყველა როლიდან მოხსნას.
– არა, თეატრს არ დაუტოვეს სხვა გზა. სიმართლე რომ გითხრათ, თეატრს ეს განცხადება რომ არ გაეკეთებინა, მე თავად არ დავდგებოდი სცენაზე, სანამ სრულად არ დამტკიცდებოდა ჩემი უდანაშაულობა. თეატრმა ეს განცხადება გააკეთა, მას შემდეგ, რაც კულტურის მინისტრმა თეა წულუკიანმა მომიწოდა, დავტოვო თეატრი, თანაც სასწრაფოდ! არადა, მთელ სოციალურ ქსელში, მგონი, ერთადერთი ადამიანი ვარ, ვინც მიულოცა თეა წულუკიანს კულტურის მინისტრად დანიშვნა და მართლა გულწრფელად გამიხარდა. ჩემი ადვოკატი რასაც დაგეგმავს, მთლიანად ვეთანხმები და ვიზიარებ, ის პროფესიონალია და შესანიშნავად იცის მისი საქმე. აუცილებლად გვექნება მჭიდრო კავშირი გამოძიებასთან, ყველა დაინტერესებულ უწყებასთან და მათ შორის საზოგადოებასთანაც. დასამალი არავისთან არაფერი გვაქვს, ჩვენი ინტერესია, პირველ რიგში სიმართლის დადგენა და ამ მიზნის მისაღწევად, რა თქმა უნდა, სარჩელს შევიტანთ საქალაქო სასამართლოშიც, მოვითხოვთ სინამდვილესთან შეუსაბამო ფაქტების უარყოფას, მორალური თუ მატერიალური ზიანის ანაზღაურების დაკისრებას, რაც მთავარია, თუკი ეს ცილისმწამებლები, ვერ დაამტკიცებენ იმას, რასაც მაბრალებენ, მერე უკვე მათვე შეუბრუნდებათ ეს საქმე.
– მე მახსოვს, გარდა იმისა, რომ მიულოცე თეა წულუკიანს, ამბობდი, მკაცრი ხელი აუცილებელიაო, თუმცა, იქვე დასძინე, ოღონდ ეს მკაცრი ხელი სამართლიანიც უნდა იყოსო. არის დღეს მინისტრი სამართლიანი?
– კი, ასე ვთქვი. კულტურის სფერო არის სენსიტიური, ძალიან რთულია ამ სფეროს მართვა, სხვანაირი ადამიანები ვართ, ცოტა მოწყვეტილები ვართ სამყაროს, ამიტომ გვეძახის ზოგი გიჟს… იუსტიციის სამინისტროს თანამშრომლებივით არ უნდა გველაპარაკოს. გაოგნებული დავრჩი, განა მისი განცხადების გამო დავრჩი გაოგნებული, მე მივხვდი, როგორი დასაცინი გავხდებოდი, იმიტომ რომ მე მისი მხარდამჭერი ვიყავი. ალბათ, სხვა გზა არ ჰქონდა და ასე უნდა ეთქვა, არ ვიცი. მე ვფიქრობ, მინისტრს არ უნდა ეთქვა ის, რაც თქვა, დაარღვია ამ განცხადებით უდანაშაულობის პრეზუმცია. მინდა, არ მინდა, მომწონს, არ მომწონს , ქალბატონი თეა, ფაქტი ერთია, მან დაარღვია უდანაშაულობის პრეზუმცია და მომიწოდა თეატრის დატოვებისკენ.
კომენტარები