“გახარიას დაუნიშნეს სტიპენდია… მაკა ბოჭორიშვილი მის “დაკავებას ვერ მოახდენს” – პაპუაშვილის ქართული ენა და “შავი იუმორის სფერო”

შალვა პაპუაშვილი მიუნხენის უსაფრთხოების კონფერენციასთან დაკავშირებით გიორგი გახარიას საკითხს გამოეხმაურა. პაპუაშვილის მტკიცებით, ყოფილი პრემიერ-მინისტრი სისხლის სამართლის საქმეში ბრალდებული პირია, რომელსაც წინასწარი პატიმრობა აქვს შეფარდებული და ძებნაში იმყოფება.

“ოცნების” ლიდერმა აღნიშნა, რომ მიუნხენში მიწვეულია საქართველოს საგარეო საქმეთა მინისტრი მაკა ბოჭორიშვილი, თუმცა, მისი თქმით, ბოჭორიშვილი შინაგან საქმეთა მინისტრი არ არის და გახარიას დაკავების საკითხი მის კომპეტენციაში ვერ იქნება.

გიორგი გახარია გახლავთ სისხლის სამართლის საქმეში ბრალდებული პირი, რომელსაც აქვს შეფარდებული წინასწარი პატიმრობა, ის არის ძებნაში. რა თქმა უნდა, სამარცხვინოა, როდესაც ის შეიძლება აღმოჩნდეს ტერიტორიაზე, სადაც შესაძლოა, სხვადასხვა ოფიციალური პირები იყვნენ. ეს ადასტურებს, რომ სამწუხაროდ, ევროკავშირის სივრცე იქცა პოლიტიკური კრიმინალების თავშესაფრად.

ის არა მხოლოდ თავს აფარებს ბერლინს, არამედ ფულსაც იღებს. როგორც ვიცით, დანიშნული აქვს სტიპენდია. სტიპენდიის დანიშვნა, მე მგონი, პოლიტიკოსების დაფინანსების ახალ ფორმაა. ასე რომ ეს კიდევ ერთხელ აჩვენებს იმ ღირებულებით უფსკრულს, რომლიდანაც მაუწყებლობს დღეს ევროკავშირი. მაკა ბოჭორიშვილი არის საგარეო საქმეთა მინისტრი და არა შინაგან საქმეთა მინისტრი, ასე რომ მის დაკავებას იქ არ მოახდენს, რა თქმა უნდა. ზოგადად,

ეს მე მგონი, უფრო შავი იუმორის სფეროა, რომ ბრალდებული პირი უსაფრთხოების კონფერენციაზე უნდა აღმოჩნდეს. არ ვიცი ვინ დაპატიჟა, ასეთი დაპატიჟებები ბევრი გვინახავს, – თქვა დღეს პაპუაშვილმა. 

13 თებერვალს მიუნხენში უსაფრთხოების 62-ე კონფერენცია იწყება, რომელსაც მსოფლიოს 50-მდე სახელმწიფოსა და მთავრობის მეთაური დაესწრება. ფორუმში მონაწილეობას მიიღებენ ასევე ასზე მეტი ქვეყნის საგარეო და თავდაცვის მინისტრები.

აშშ-ის დელეგაციას სახელმწიფო მდივანი მარკო რუბიო უხელმძღვანელებს. კონფერენციის დღის წესრიგშია ტრანსატლანტიკური ერთიანობა, უკრაინის ომი, ირანი, სირია და ევროპული უსაფრთხოება.

ღონისძიებაზე მიწვეულია საქართველოს საგარეო საქმეთა მინისტრი მაკა ბოჭორიშვილი.

ამასთან, პარტია „გახარია საქართველოსთვის“ ინფორმაციით, ყოფილი პრემიერ-მინისტრი გიორგი გახარია 13–15 თებერვალს MSC-ის ფარგლებში საერთაშორისო პარტნიორების, მათ შორის აშშ-ისა და ევროკავშირის წარმომადგენლებთან შეხვედრებს გამართავს.