“გაიჭირვებდა ადამიანი, მინი ტრაქტორს შეიძენდა, მაგრამ იმავე წელს მომპარავენ” – გამზარდია

რეგიონებში სულ იყო კრიმინალი და ვერც ერთი მთავრობა იტყვის, მოვსპეთო. 2009 წელსაც კი იარაღით დამაყაჩაღეს. სოფლებში ეზოებში ნივთების დატოვება ეშინოდათ, რომ არ მოეპარათ. 7-8 წლის წინ, სოფელში, ეზოში გაფენილი სარეცხი მოგვპარეს ღამით (იმის შემდეგ, სარეცხს დილით ადრე ვრეცხავთ, რომ გაშრობა მოასწროს და საღამოს ავკრიფოთ).

შემოდგომაზე, კიდეც გახსოვთ, ვწერდი, სოფელში ცხაურები რომ მოგვპარეს არაერთ ოჯახს. დამნაშავეები ვერ დაიჭირეს, ცხაურებდ ვერ მიაგნეს, დღემდე ფიცრები გვიდევს ეზოს შემოსასვლელში და დიდი მანქანა ან ტრაქტორი, უბრალოდ, ვერ შემოვა. ტრაქტორი მყავს შემოსაყვანი, ვერ ვახერხებ და პრობლემა მაქვს.

სულ ვწერ, რომ თოხზე და ბარზე ვარ დღემდე. გაიჭირვებდა ადამიანი, აიღებდა ვალს და მინი ტრაქტორს შეიძენდა, მაგრამ არც კი ვფიქრობ ამას, რადგან იმავე წელს მომპარავენ. გამოდის, რომ რაღაც წარმოების განვითარების პერსპექტივასაც კი ვერ ვაღწევთ, რომ მოსახლეებმა ცოტა მეტი დავამუშაოთ და მეტი მოსავალიც მივიღოთ, რასაც სხვა შემთხვევაში, მხოლოდ თოხზე და ბარზე მუშაობით ვერ ვახერხებთ.

აინტერესებს ეს ვინმეს? ან ხელისუფლებისგან ან ოპოზიციური პოლიტიკოსებისგან გაგვიგია ვინმეს, რომ საკითხზე ემუშავათ? აღელვებს სოფლებში მცხოვრები ადამიანების იღბალი ვინმეს? – არ აღელვებს. ამ პრობლემებს თვითმმართველობები ვერ გაუმკლავდებიან, რადგან კრიმინალი რეგიონში მთელი ქვეყნის პრობლემაა და არავის, ვისაც ხელეწიფება, არც კი აწუხებს.

მერე იტყვით, გაუცხოვებულია ხალხი პოლიტიკოსებისგანო. რაც ადამიანებს აწუხებთ, თქვენთვის უინტერესოა და გულგრილები ხართ ყველას მიმართ, აი, ამიტომ…”