“გადაიგზავნა სასამართლოში” – დავით ხიდაშელის კომპანიას სამართალდარღვევის ოქმები შეუდგინეს

დავით ხიდაშელის კომპანიას სამართალდარღვევის ოქმები შეუდგინეს.

განცხადება რამდენიმე საათის წინ, გარემოსდაცვითი ზედამხედველობის დეპარტამენტმა გამოაქვეყნა.  შპს “ეიჩ ჯი კაპრა კაუკასიკას”, ლიცენზიით დაკისრებული ვალდებულებების დარღვევას ედავებიან.

გარემოსდაცვითი ზედამხედველობის დეპარტამენტის უფლებამოსილი თანამშრომლების მიერ, სამონადირეო მეურნეობა შპს “ეიჩ ჯი კაპრა კაუკასიკას” მიმართ ადმინისტრაციული სამართალდარღვევის ოქმები შედგა.

„ეიჩ ჯი კაპრა კაუკასიკა” სსიპ გარემოს ეროვნული სააგენტოს უფროსის 2022 წლის 23 მარტის №38/ს ბრძანების მეორე პუნქტის „ქ)” ქვეპუნქტის თანახმად, ვალდებული იყო, ლიცენზიის გაცემიდან 12 თვის განმავლობაში სამინისტროში წარმოედგინა სამონადირეო მეურნეობის მართვის გეგმის პროექტი მის მიერ სალიცენზიო ფართობზე არსებული ბიომრავალფეროვნების კომპონენტების შესახებ, წლის სხვადასხვა სეზონისთვის ჩატარებული კვლევის საფუძველზე, სამინისტროსთან შეთანხმებული სქემისა და მოთხოვნების შესაბამისად. ლიცენზიანტს სამონადირეო მეურნეობის მართვის გეგმის პროექტი არ წარუდგენია, რის საფუძველზეც, საქართველოს ადმინისტრაციულ სამართალდარღვევათა კოდექსის 66-ე მუხლის მე-3 ნაწილით გათვალისწინებულ სამართალდარღვევაზე, კომპანიის მიმართ შედგა ადმინისტრაციული სამართალდარღვევის შესახებ ოქმი, რომელიც ამბროლაურის რაიონულ სასამართლოში გადაიგზავნა.

ამასთან, შპს „ეიჩ ჯი კაპრა კაუკასიკა”, საქართველოს კანონის „ლიცენზიებისა და ნებართვების შესახებ” 21-ე მუხლის მე-3 პუნქტის თანახმად, ვალდებული იყო, ყოველწლიურად, 01 აპრილიდან 01 მაისამდე,  წარმოედგინა ანგარიში სალიცენზიო პირობების დაცვის შესახებ. „ეიჩ ჯი კაპრა კაუკასიკას”, დადგენილ პერიოდში, სალიცენზიო პირობების დაცვის შესახებ 2022 წლის ანგარიში არ წარმოუდგენია; შესაბამისად, საქართველოს ადმინისტრაციულ სამართალდარღვევათა კოდექსის 66-ე მუხლის მე-3 ნაწილით გათვალისწინებულ აღნიშნულ სამართალდარღვევაზე შედგა ადმინისტრაციული სამართალდარღვევის შესახებ ოქმი, რომელიც, შემდგომი განხილვის მიზნით, ასევე გადაიგზავნა ამბროლაურის რაიონულ სასამართლოში”- წერის განცხადებაში. 

ცნობისთვის, “მთის ამბების” ჟურნალისტური გამოძიებით დგინდებოდა, რომ დავით ხიდაშელს ჯერ რაჭის მესამედი ნახევარი საუკუნით გადასცეს, შემდეგ კი გლეხების მამაპაპისეული ნაკვეთებიც ხიდაშელის ე.წ  საოკუპაციო საზღვარში მოაქციეს.

პრორუსი ბიზნესმენის საკუთრების მომიჯნავედ  200-ზე მეტი მიწის  ნაკვეთი დაყადაღებულია და ადგილობრივებს მათ კანონის სახელით ართმევენ.

გლეხებს, რომლებიც მიწებს წლებია ფლობენ და ამუშავებენ ამბობენ, რომ საკუთარ ტერიტორიაზე შესვლაც კი ეკრძალებათ.