22 მაისს ევროპარლამენტმა რუსული და ბელარუსული სასუქების იმპორტზე ახალი ტარიფების დაწესებას მხარი დაუჭირა. დამტკიცებული კანონპროექტი მოსკოვისთვის ნაკლები თანხის გადახდას ისახავს მიზნად, რომლითაც კრემლი უკრაინაში მიმდინარე ომს აფინანსებს.
ევროპარლამენტის გადაწყვეტილებას უარყოფითად შეხვდნენ ევროპელი ფერმერები, ვინაიდან ევროკავშირში აზოტზე დაფუძნებული სასუქების იმპორტის მეოთხედზე მეტი ამჟამად რუსეთიდან შედის. ევროკომისიის მიზანიც რუსული სასუქების ბაზარზე დამოკიდებულების შემცირება იყო.
რუსული სასუქის იმპორტზე დაწესებული გადასახადები ძალაში ივლისში შევა და თანდათანობით გაიზრდება მანამ, სანამ რუსული სასუქის შესყიდვა 2028 წლისთვის ბლოკის ქვეყნების მასშტაბით მომგებიანი აღარ იქნება.
კანონპროექტის მხარდამჭერი ლატვიელი ევროპარლამენტარის, ინეს ვაიდერეს თქმით, რუსეთის მიერ უკრაინაში სრულმასშტაბიანი შეჭრიდან სამი წლის შემდეგ ევროკავშირმა “რუსული ომის მანქანის” დაფინანსება საბოლოოდ უნდა შეწყვიტოს და რუსულ სასუქებზე ევროპელ ფერმერთა დამოკიდებულება შეამციროს.
კანონმდებლობა კვლავ საჭიროებს ფორმალურ თანხმობას ევროკავშირის წევრი ქვეყნებისგან, თუმცა მათ ამ ნაბიჯის მხარდაჭერისკენ უკვე მიანიშნეს.
ფერმერთა ჯგუფები ამბობენ, რომ ახლად დაწესებულმა ტარიფებმა შესაძლოა, სოფლის მეურნეობის პროდუქციის წარმოების ხარჯების ზრდა გამოიწვიოს. ევროკავშირის ფერმერთა მთავარი ასოციაციის, Copa-Cogeca-ს განცხადებით, რუსული სასუქები ყველაზე ხელმისაწვდომი ღირებულების იყო “კარგად დამკვიდრებული ლოგისტიკის” გამო.
ევროკავშირში იმედოვნებენ, რომ რუსეთზე დაწესებული ტარიფები ადგილობრივ სასუქების წარმოებას წაახალისებს.
ასევე, ევროკავშირი იმპორტის გადასახადების გაუქმებას განიხილავს ჩრდილოაფრიკულ და ცენტრალური აზიის ქვეყნებზე, ასევე ტრინიდადი და ტობაგოზე, აშშ-ზე, ნიგერიაზე და სხვა.
კომენტარები