საქართველოში ევროკავშირის სადამკვირვებლო მისია (EUMM) ადასტურებს ადმინისტრაციულ გამყოფ ხაზთან მომხდარ ინციდენტს. რადიო თავისუფლებას მისიაში უთხრეს, რომ ინციდენტის შედეგადაც ევროკავშირის სადამკვირვებლო მისიის წარმომადგენლებს არაფერი დაშავებიათ, „მათ იმოქმედეს უსაფრთხოების პროტოკოლიდან გამომდინარე და დატოვეს კონფლიქტის ზონა“.
ამ საკითხს ერგნეთში დღეს ინციდენტების პრევენციისა და მათზე რეაგირების მექანიზმის ფარგლებში მიმდინარე 110-ე შეხვედრაზე განიხილავენ.
“ანტისაოკუპაციო მოძრაობის” ლიდერმა დავით ქაცარავამ სოციალური ქსელით დღეს გაავრცელა ინფორმაცია, სადაც წერდა:
“დღეს IPRM ის, ე.წ. ერგნეთის შეხვედრაა, რომელიც პერიოდულად ოკუპანტების ქართული მხარის და ევროკავშირის სამონიტორინგო ჯგუფის მონაწილეობით ტარდება.
მასზე დღეს, გუშინ გატაცებული მოქალაქის ამბები უნდა გაირკვეს, დაახლოებით 2 კვირის წინ რომ ჩვენი 2 მოქალაქე გაიტაცეს და ჯერ არ დაუბრუნებიათ, მათი საკითხიც დადგება, მამუკა ჩხიკვაძე რომ წელზე მეტია ცხინვალის ციხეში, იმედი მაქვს მასზეც ისაუბრებენ.
პარასკევს, 13 იანვარს, სოფელ მეჯვრისხევში ჩასულ EUMM ის სამონიტორინგო ჯგუფს, რუსებმა “ცეცხლი” ჰაერში შეაგებეს. წადითო.
არსებობს ამის ვიდეო მტკიცებულება? სამწუხაროდ არა.
საიდან ვიცი?
ფაქტობრივად თვითმხილველმა მითხრა, ადგილობრივმა, რომელიც შორიახლოს გადაადგილდებოდა.
იტყვის ამას საჯაროდ? რა თქმა უნდა არა, ეშინია როგორც რუსების შურისძიების, ასევე ადგილობრივი ზეწოლის.
გვჯერა? მე კი. დაუსვით კითხვები EUMM ის სამონიტორინგო ჯგუფის წევრებს, იმედია, არ მოიტყუებიან.
თუ დამალავენ ამ ინფორმაციას და არაფერს იტყვიან საჯაროდ, მაშინ თავის რეპორტებში აუცილებლად ჩადებენ ამ ინფოს.
რატომ მოიქცნენ ესე ორკები? წარმოდგენა არ მაქვს, თუმცა დარწმუნებული ვარ, რომ ეს აგრესიული, გარკვეული სახის მესიჯია.
დაადასტურებს სუსი? არ მგონია.
დიდ იმედს ვიტოვებ, რომ დღეს ამ შეხვედრაზე ამ საკითხს დააყენებს ჩვენი მხარე და რამე დისკომფორტს მაინც შეუქმნის ოკუპანტს.
იმედს კი ვიტოვებ, მაგრამ…”
ცნობისთვის, ანტისაოკუპაციო მოძრაობა უკვე 2 000 დღეა პატრულირებს.
დავით ქაცარავა:
პატრულირების 2000 დღე…
2000 დღის წინ დავიწყეთ და დღემდე არ გავჩერებულვართ.
მაგრამ დადგება დღე და გავჩერდებით. რა თქმა უნდა გავჩერდებით.
გავჩერდებით, როდესაც დავბრუნდებით ცხინვალში, სოხუმში და…ლესელიძეში…
ძალა ერთობაშია
ბრძოლას ყოველთვის აქვს აზრი
კომენტარები