“ეს რუსეთი არაა, ენერგოდარიდან დღეს მტერი შიშველი ხელებით განდევნეს, რუსების მონებს ამდენი თავისუფალი ადამიანი არასდროს უნახავთ” – ზელენსკი

უკრაინის პრეზიდენტი ვოლოდიმირ ზელენსკი გავრცელებულ ვიდეომიმართვაში ამბობს:

“დიდებული ქვეყნის დიდებულო ერო,

მინდა უკრაინულ ქალაქებსა და მათ ერთგულ მცველებს მივმართო თავისუფალი უკრაინის სახელით, სადაც მზე მხოლოდ სასურველი სტუმრებისთვის ანათებს და ტანკზე შემსხდარი ტურისტებისთვის.

ბერდიანსკიდან ხერსონის ჩათვლით, თავისუფალ ადამიანებს მონებმა ცეცხლი გაუხსნეს. მონები მოხუც ქალს დაუპირისპირდნენ, რომელსაც ხელში თეთრი დროშა ეჭირა, ასევე ახალგაზრდა გოგოს, თეთრი პლაკატით ხელში. რუსების მიერ გამოგზავნილ მონებს ამდენი თავისუფალი ადამიანი არასდროს უნახავთ. ქუჩებში, მოედნებზე არასოდეს უნახავთ ათასობით ადამიანი, რომლებსაც შეიარაღებული მონების არ ეშინიათ. მონებისთვის თავისუფლება უცხოა.

ხერსონო, მედგრად იდექი, არასდროს დავივიწყებთ კადრებს, რომელიც დღეს ვნახეთ. დღეს 40 მილიონი უკრაინელი თქვენთან ერთად იდგა. მილიონობით უკრაინელმა მსოფლიოს მასშტაბით, დაინახა, როგორი თავისუფლები ხართ, როგორ იბრძოდით და როგორ გინდათ დროებით წართმეული თავისუფლების დაბრუნება. ამ ავადმყოფებს იქ მშვიდი დღეები არ ელოდებათ. თითოეულ ოკუპანტს, ვინც მშვიდობიან მოქალაქეებს ცეცხლი გაუხსნა, შავი ლენტი გადაეფარება. ჩვენ კი გამარჯვებას ისევე ვიზეიმებთ, როგორც ენერგოდარის მცხოვრებლები, რომლებმაც დღეს მტერი შიშველი ხელებით განდევნეს.

შავი ლენტი გადაეფარება მტერს ბერდიანსკშიც. მელიტოპოლშიც, კახოვკაშიც და ყველა ქალაქში, სადაც ჩვენს მოქალაქეებს იტაცებენ.

ეს რუსეთი არაა, აქ წინააღმდეგობა სულშია გაჯერებული. 

უკრაინის არცერთ ნაწილში არ მინდა, ადამიანებმა იფიქრონ, რომ მათი ქვეყანა მათზე არ ფიქრობს, ან არ ახსოვს. ყველა ჯერზე, როდესაც გტკივათ, გიმძიმთ, როცა ყველაფრის წინააღმდეგ მიდიხართ, გევედრებით, იცოდეთ, რომ ამ დროს ჩვენ თქვენზე ვფიქრობთ და გული გვისკდება, რადგან ადგილზე ვერ ვართ. გთხოვთ, გაუძელით იქამდე, სანამ უცხოტომელებს არ გავყრით. თქვენი წინააღმდეგობა წარმატების გარანტიაა.

შემოჭრის დღიდან ახალი გმირები იბადებიან, ქალები და კაცები ჩვენი ქვეყნის დასაცავად დგებიან. ყველას, უკრაინის აღმოსავლეთით, დასავლეთით, სამხრეთით, ჩრდილოეთით, ასევე ქვეყნის ცენტრალურ ნაწილსა და საზღვარგარეთ მცხოვრებნი.

მტერს არ სჯერა, რომ ეს რეალობაა. მენდეთ, დავამახსოვრებინებთ, რომ მათი გზა ჩვენამდე არ მოდის. უკრაინულ ქალაქებში ფეხს ვერასდროს მოიკიდებთ. ვერც კიევში, ვერც ხარკოვში, ვერც ბერდიანსკსა და მარიუპოლში. იმ მარიუპოლში, რომელსაც ასე ანადგურებთ, მაგრამ მაინც მედგრად დგას.

დიდებული უკრაინის დიდებულო ერო – ამ სიტყვებს უბრალოდ არ ვამბობ, ეს ეხება ყველას, ვინც ქალაქშია, ვინც სოფელში ცხოვრობს, ვინც საზღვრებს გარეთაა. ვინც თავისუფალია და დროებით ოკუპირებულ ტერიტორიებზე, ყირიმში, დონბასსა და ლუგანსკშია. ჩვენი უკრაინა ყველამ უნდა დავიცვათ და არაფრის დალოდება არ შეიძლება.

მოგმართავთ ყველა უკრაინელს, სადაც არ უნდა იყოთ, ყველაფერი გააკეთეთ სამშობლოსა და ჩვენი ერის დასაცავად. იბრძოლეთ და დაეხმარეთ! განდევნეთ ოკუპანტები და მძარცველები, რომ უკრაინა გადარჩეს და თავისუფლად და ბედნიერად ვიცხოვროთ იმ ქვეყანაში, რომელიც ასე ძალიან გვიყვარს.

დიდება უკრაინას!”