რეგიონში მზარდი დაძაბულობის გამო, აშშ-ს ახლო აღმოსავლეთში მდებარე რამდენიმე მსხვილი ამერიკული სამხედრო ბაზიდან პერსონალის ნაწილი გაჰყავს. ამის შესახებ ინფორმაციას გამოცემა Reuters-ი დიპლომატებზე დაყრდნობით ავრცელებს.
აღნიშნული ინფორმაცია მას შემდეგ გავრცელდა, რაც ირანის ერთ-ერთმა მაღალჩინოსანმა Reuters-ს უთხრა, რომ თეირანმა მეზობელი ქვეყნები გააფრთხილა, რომლებიც საკუთარ ტერიტორიაზე აშშ-ის სამხედროებს მასპინძლობენ, რომ თუ ვაშინგტონი დარტყმას განახორციელებს, ირანი ამერიკულ სამხედრო ბაზებზე მიიტანს იერიშს.
გამოცემის ცნობით, კატარში, ალ-უდეიდის საჰაერო ბაზის პერსონალს ქვეყნის დატოვება ოთხშაბათს საღამომდე ურჩიეს.
ალ-უდეიდი ახლო აღმოსავლეთში ყველაზე დიდი აშშ-ის ბაზაა, სადაც დაახლოებით 10 000 სამხედროა განთავსებული.
“ეს პოზის შეცვლაა და არა ევაკუაცია” – განუცხადა ერთ-ერთმა დიპლომატმა Reuters-ს.
ცნობისთვის, ირანში 28 დეკემბრიდან გრძელდება მასშტაბური ანტისამთავრობო პროტესტი, რომელიც მძიმე ეკონომიკურმა კრიზისმა, ინფლაციამ და ხელისუფლების რეპრესიებმა გამოიწვია. აქციებს თან ახლავს ძალადობრივი ჩახშობა, ინტერნეტის ბლოკირება და ათასობით ადამიანის დაკავება. საერთაშორისო მედიისა და უფლებადამცველი ორგანიზაციების ინფორმაციით, დაღუპულთა რიცხვი ათიათასებს აღწევს.
კომენტარები