„ეს ჩანაწერები ივანიშვილთან მიაქვთ და უყურებს და ბედნიერია“ – გიორგი გახარია

საქართველოს ყოფილი პრემიერი ამბობს, რომ მასზე თავდასხმა ორგანიზებულ ხასიათს ატარებდა და დამკვეთად პირადად ბიძინა ივანიშვილს ასახელებს.

“ივანიშვილის პირადი ინსტრუქციით ხდება ეს ყველაფერი, სხვანაირად როგორ? მერე ეს ამას უყურებს, მიაქვთ და უყურებს და ბედნიერია“, – თქვა “გახარია საქართველოსთვის“ ლიდერმა “ტვ პირველის“ გადაცემა, “დღის ამბების“ ეთერში.

ყოფილი პრემიერი ივანიშვილს მოღალატეს უწოდებს და აცხადებს, რომ პერსონალიზირებული და ინდივიდუალური თავდასხმები ოლიგარქის პირადი ინსტრუქციებით ხდება.

ქვეყნის მოღალატე ნათლად ჩანს ვინ არის, ეს ივანიშვილია. მათი სამშობლო საქართველო კი არა ფულია. ძალადობის ლეგიტიმაცია ამ ქვეყანაში შეუძლია ერთადერთ ადამიანს, ეს მაშინ მოახდინა, როდესაც მშვიდობიანი აქციების დარბევა დაიწყო. მაშინ ჰქონდა ერთი დავალება გაცემული – მთავარია არ მოკლათ, დანარჩენი ყველაფერი შეგიძლიათო. ამან არ იმუშავა და აქციები უფრო მასობრივი გახადა, რის შემდეგაც ეს დავალება პერსონალიზირებული გახდა, ინდივიდუალური და რა თქმა უნდა, ეს ყველაფერი მისი პირადი ინსტრუქციებია და დარწმუნებული ვარ, რომ ის თვითონ მიუთითებს, რა ფორმები იქნეს გამოყენებული და ვის მიმართ, – აღნიშნა მან.

გახარიამ „ტვ პირველის“ ეთერში პრემიერობიდან წასვლის გადაწყვეტილებაზეც ისაუბრა და აღნიშნა, რომ საკუთარი ნაბიჯით მან ივანიშვილს “საჩუქარი გაუკეთა“.

დღეს 4 წელი გავიდა, ჩემი გადადგომიდან, საჩუქარი გავუკეთე, არცერთი წუთი ამ გადაწყვეტილებაზე არ მინანია. ეს არ იყო მარტო ჩემი გადაწყვეტილება, გუნდათან ერთად მივიღე. ეს იყო ყველაზე სწორი გადაწყვეტილება, რაც საქართველოში პოლიტიკაში ყოფნის დროს მიმიღია. ეს იყო ქვეყნის ღალატზე უარის თქმა და სხვა არაფერი. ეს იყო გააზრებული გადაწყვეტილება. მაშინ საქართველოს მოქალაქეების უმეტესობისთვის ეს გადაწყვეტილება გაუგებარი და კითხვის ნიშნების გამჩენი იყო,  მაგრამ დარმწუნებული ვარ, უმრავლესობა, ამ წლების შემდგომ, სულ უფრო და უფრო ნათლად ხედავს ჭეშმარიტ და ნამდვილ მიზეზებს ამ გადაწყვეტილების“, – განაცხადა გახარიამ.