ლევან ჯავახიშვილი
ევროპარლამენტარ ვიოლა ფონ კრამონის სკანდალურ განცხადებასა და ტრაგიკულ პერსპექტივებზე პოლიტიკური მოძრაობა „ტრიბუნას“ ლიდერი, დავით ჭიჭინაზე „ალიასთან“ საუბრობს:
– არა მარტო ფინანსურ დახმარებებს შეგვიჩერებენ, საგარეო ვალის რესტრუქტურიზაციას აღარ გაგვიკეთებენ ევროპის ცალკეული სახელმწიფოები და ევროპისა თუ უშუალოდ, ევროკავშირის ფინანსური ინსტიტუტები. ამ უზარმაზარი ვალის გადახდას რომ მოგვთხოვენ, მერე სად მიდის „ქართული ოცნება“? ხელფასებს და პენსიებს ვეღარ დაარიგებს, დაემხობათ ბიუჯეტი თავზე. ევროპამ თუ მოინდომა, ეკონომიკურ კოლაფსს მოაწყობს საქართველოში, ერთ წელიწადში „ბანანის სახელმწიფოდ “ გვაქცევენ. როგორ? ვიზალიბერალიზაციას გაგიჩერებენ და ეს კიდევ უამრავ ადამიანს დააზარალებს. გვაიძულებენ ვალების გადახდას, დახმარებებს შეგვიწყვეტენ, საკუთარ ავიაკომპანიებს აუკრძალავენ საქართველოში ფრენებს და ტურიზმს, რაც დარჩა, იმასაც დაგვამხობენ თავზე. ყველა სახის ექსპორტს შეწყვეტენ ან შეზღუდავენ. ჯერ რა, სულ რამდენიმე სახის პროდუქცია გადის ევროპაში საქართველოდან, იმასაც ვეღარ გავიტანთ. ემიგრანტები თანხებს რიცხავენ საქართველოში. ამ ემიგრანტებს რომ აღარ მისცენ ამ თანხების გადმორიცხვის უფლებას, წარმოიდგინეთ, რა მოხდება. ეტყვიან იმ ხალხს, რომ თქვენი ხელისუფლება არ იქცევა კარგად, მიგვაჩნია, რომ ჩვენს ქვეყანაში ნაშოვნი ფული არ უნდა გადაირიცხოს საქართველოშიო. იმ ფულს კი არავინ წაართმევს ემიგრანტებს, მაგრამ არ გადმოარიცხინებენ აქ. ყოველთვიურად 200–250 მილიონი დოლარი ირიცხება საქართველოში, ეს წელიწადში 2 –2.5 მილიარდი დოლარია და აქედან, მილიარდ დოლარზე მეტი ევროპის ქვეყნებზე მოდის. ეს თუ მოხდა, დამთავრდა, უკვე კოლაფსია. ეს და სხვა ბერკეტებიც აქვთ და თუ აამუშავეს, ერთ დღეში ლარის კურსი დოლართან ერთი ხუთთან გახდება და შესაძლოა, ეს 5 მოგვენატროს მალე. ისეთ დღეში ჩააგდებენ „ქართულ ოცნებას“, ხალხი გამოვა ქუჩაში და ხელისუფლების შენარჩუნებაზე კი არა, იმაზე იფიქრებენ, ამ ხალხს სად დაემალონ. ამ დაქცეული ეკონომიკის პატრონები, ვის ეჯგიმებიან? უცხოური ფინანსური ინექციებით გვიდგას სული. ირაკლი კობახიძე და ზოგიერთი ახლად გამოჩეკილი პოლიტიკოსები რომ ჰყავთ, იმათ ჭკუაზე რომ იმართება ქვეყანა, უკეთესს რატომ ველით? უარეს დღეში რომ არ ვართ, მე ის მიკვირს. აზრზე არ არიან, რას ნიშნავს საერთაშორისო პარტნიორი, დადგენილი საერთაშორისო წესები და ნორმები, რას ნიშნავს მათი დაცვა, აღებული ვალდებულებების შესრულება. ევროპისგან მუდამ სამაგალითოდ ისჯებიან ის ადამიანები, ხელისუფლებების ლიდერები და ქვეყნები, ვინც ამ დადგენილ წესებს იცავს.
შეგახსენებთ, რომ ევროპარლამენტარი ვიოლა ფონ კრამონმა განაცხადა – 19 აპრილის ხელშეკრულების გაფორმებამდე ევროკავშირი განიხილავდა საქართველოსთვის დახმარების შეწყვეტას. მან თქვა, რომ ეს საკითხი ისევ განიხილება, თუ “ქართული ოცნება” არ დაუბრუნდება შეთანხმებას. ამ საკითხზე მან “რადიო თავისუფლებასთან” ისაუბრა:
“19 აპრილის შეთანხმებამდე, მარტში მე საქართველოში ვიყავი და მერე განხილვა გვქონდა ევროპარლამენტში. ჩვენ ვსაუბრობდით იმ დროს შესაძლებლობაზე, შეგვეჩერებინა ფინანსური დახმარება, რა თქმა უნდა, ეს საუბარი შედგა. შემდეგ ხელმოწერილი იყო ხელშეკრულება და ჩვენ ძალიან მოხარულები ვიყავით, რომ ეს იქნებოდა ათვლის წერტილი ყველა სხვა რეფორმის განსახორციელებლად… ჩვენ ახლა დავუბრუნდით ძველ მდგომარეობას და უნდა გავაანალიზოთ, როგორ გადავწყვიტოთ შექმნილი სიტუაცია. იქიდან გამომდინარე, რომ ჩვენ დიდ თანხებს ვაწვდით საქართველოს, ჩვენ გვინდა, რომ ეს თანხები სწორი მიმართულებით დაიხარჯოს. ეს არის გადასახადის გადამხდელის თანხები და ეს თანხები არ უნდა აღმოჩნდეს რამდენიმე ადამიანის ხელში. იქნება ამ საკითხებზე მსჯელობა, თუ “ქართული ოცნება” არ გადახედავს თავის გადაწყვეტილებას”…
კომენტარები