“ეს არის პირველი პრეპარატი, რომელიც შეიძლება გამოიყენონ სახლის პირობებში” – ზაზა წერეთელი

ნორვეგიის სამეფოს ჯანდაცვის სამინისტროს უფროსი მრჩეველი ზაზა წერეთელი სოციალურ ქსელში ეხმაურება ამერიკის წამლის სააგენტოს მიერ, ანტივირუსული პრეპარატისათვის ავტორიზაციის მინიჭებას. 

მისი თქმით, ბოლო მონაცემები მიუთითებს, რომ წამალი ინარჩუნებს ეფექტურობას “ომიკრონის” წინააღმდეგაც.

“აშშ-ს სურსათისა და წამლების სააგენტომ გასცა ავტორიზაცია Pfizer-ის ანტივირუსული Covid-19 აბზე, რომელიც გაიყიდება ბრენდის სახელით Paxlovid.

ეს არის პერორალური პრეპარატი – პირველი პრეპარატი რომელიც შეიძლება გამოყენებული იქნას სახლის პირობებში სამკურნალოდ მაღალი რისკის მქონე ზრდასრული პაციენტებისა და მინიმუმ 12 წლის პედიატრიული პაციენტებისათვის.

წამლის მწარმოებელმა განაცხადა, რომ მზად არის დაუყოვნებლივ დაიწყოს მედიკამენტის მიწოდება შეერთებულ შტატებისათვის და გაზარდოს მისი წარმოება 120 მილიონი კურსის წარმოებამდე. 

აშშ-ს მთავრობის კონტრაქტი Pfizer-ის წამლის 10 მილიონი კურსზე უკვე გაფორმებული აქვს და მისი ფასია 530 აშშ დოლარი თითო კურსზე.

Pfizer-ის კლინიკური კვლევის მონაცემებმა აჩვენა, რომ მისი ორი წამლის ანტივირუსული რეჟიმი 90%-ით ეფექტური იყო მძიმე ავადმყოფობის პრევენციისათვის მაღალი რისკის მქონე პაციენტებში (ჰოსპიტალიზაციისა და სიკვდილის თავიდან ასაცილებლად). 

ბოლო მონაცემები მიუთითებს, რომ ის ინარჩუნებს თავის ეფექტურობას Omicron ვარიანტის წინააღმდეგაც.

აბების მიღება განკუთვნილია ყოველ 12 საათში ხუთი დღის განმავლობაში, უმალვე სიმპტომების დაწყებიდან”, – წერს ზაზა წერეთელი სოციალურ ქსელში.