პარტია „გახარია საქართველოსთვის“ დეპუტატი, გიორგი შარაშიძე სალომე ზურაბიშვილის განცხადებას, რომელმაც მათ „მოღალატეები“ უწოდა, ეხმაურება და ამბობს, რომ ღალატი ქართული ოცნების ადგილობრივ არჩევნებში არ მონაწილეობაა.
„ღალატი არის ის, როდესაც ხალხს წარმომადგენლის გარეშე დატოვებ საქართველოს 64-ვე მუნიციპალიტეტში. როდესაც ბრძოლის ველს გაეცლები, მოღალატეობრივად გაიპარები ბრძოლის ველიდან, ხალხს მოუწოდებ, რომ არჩევნებზე არ მივიდნენ, მოვიდნენ რუსთაველზე, სადაც მშვიდობიანი დამხობაა დაანონსებული და ამაზე პასუხისმგებლობას არ იღებ და საერთოდ არ ხსნი რატომ მოიქეცი ასე, ეს საჩუქარი რატომ გაუკეთე „ოცნებას“, ეს არის ღალატი, ქალბატონო სალომე-თქო, გადაეცით ჩვენგან, სანამ ჩვენს ღალატზე ვინმე ისაუბრებს. და ამას კიდევ ისტორია კარგად შეაფასებს – ვინ არის რეალურად მოღალატე”
კითხვას, სად არის და რას აკეთებს გიორგი გახარია, რას ამბობს სალომე ზურაბიშვილის ამ განცხადებაზე, იგი პასუხობს, რომ გახარია სოციალურ ქსელებში აქტიურობს და რომ მათი ლიდერის და გუნდის პოზიცია იდენტურია.
ცნობისთვის, საქართველოს მეხუთე პრეზიდენტმა, სოციალურ ქსელში, როდესაც ხალხის კითხვებს პასუხობდა, აღნიშნა, რომ პარტიები, რომლებიც ხან შედიან პარლამენტში და ხან „ოცნების“ გზავნილებს იმეორებენ, ესენი არიან მოღალატეები.
მისი თქმით, ოპოზიცია ერთობას მაინც მიაღწევს.
კომენტარები