ლევან ჯავახიშვილი
„ალიას“ ესაუბრება „ლეიბორისტული პარტიის“ გენერალური მდივანი, გიორგი გუგავა.
-ბატონო გიორგი, პარლამენტში დეოლიგარქიზაციის კომისია შექმნეს, რომლის თავმჯდომარეც ანრი ოხანაშვილი გახდა. ოხანაშვილი და „ქართული ოცნების“ სხვა ლიდერები წინასაწარ აცხადებენ, კომისია კი შევქმენით, ანტიოლიგარქიულ კანონსაც მალე მივიღებთ, მაგრამ კანონი ბიძინა ივანიშვილს არ შეეხება, ის ოლიგარქი არ არისო. აბა, მე და თქვენ ვართ ოლიგარქები?
–კომიკურია უკვე ის ფაქტი, რომ ამ კომისიას სათავეში ანრი ოხანაშვილი ჩაუყენეს, რომელიც კბილებით იცავს ბიძინა ივანიშვილს და ბოლო თვეებია იმას აცხადებს, ივანიშვილი ოლიგარქი არ არისო. აქედან ჩანს, რომ ეს კომისია ფიქციაა და არ აპირებენ არანაირი ანტიოლიგარქიული კანონის მიღებას. ამ ქვეყანაში ოლიგარქი არის ბიძინა ივანიშვილი და სხვა არავინ. ოლიგარქია, ვინც ფლობს დიდ ფინანსებს და გავლენს ხელისუფლებაზე. ივანიშვილზე დგას ეს ხელისუფლება, „ქართული ოცნების“ დეპუტატები ივანიშვილის ყმები არიან და ცხადია, ყმები ისეთ კანონს ვერ მიიღებენ, რომელიც ივანიშვილს მცირე დისკომფორტს მაინც შეუქმნის… ვერც იმას შებედავენ ივანიშვილს, რომ თქვან, ვნახოთ, ვის შეეხება ეს კანონი, ვნახოთ, ივანიშვილს შეეხება თუ არაო. ვერც ოხანაშვილი იტყვის ამას და ვერც სხვა. იმასაც ვერ ბედავენ, მცირე ხნით მაინც, ეჭვქვეშ დაყენონ ივანიშვილის სტატუსი. ოლიგარქია, ივანიშვილის მმართველობა, წარმოადგენს ეროვნულ საფრთხეს. ეს ხელისუფლება არის რუსული საოკუპაციო ადმინისტრაციის გაგრძელება საქართველოში. ეს ყველაფერი უნდა გავაცნობიეროთ კარგად. ნურავის ექნება იმის ილუზია, რომ ესენი ევროკომისიის 12 პუნქტს შეასრულებენ და რაიმეს გააკეთებენ ევროკავშირის სტატუსის მისაღებად. ამას მხოლოდ მიამიტები და ბრიყვები დაიჯერებენ. ეს არის ბლეფი და საუკუნის პოლიტიკური აფიორა. ევროსაბჭომ თავის რეზილუციაში პირდაპირ ჩაწერა, რომ საქართველოში ოლიგარქი ბიძინა ივანიშვილია. მერე იგივე ცალკეულმა ევროპარლამენტარებმა გაიმეორეს და ესენი ანტიოლიგარქიული კანონის მიღებამდე აცხადებენ, ივანიშვილი არ არის ოლიგარქი, ეს კანონი ივანიშვილს არ შეეხებაო. ეს 12 პუნქტი რომ შეასრულონ, ეს იმას ნიშნავს, რომ საკუთარი თავი, საკუთარი ფეხით აიყვანონ სახრჩობელაზე. ამას კი, ცხადია, არ გააკეთებენ. სამწუხაროა, რომ ოპოზიციის ნაწილი ამ კომისიაშიც შევიდა და იმ დანარჩენ ოთხ კომისიაში შესვლასაც აპირებენ, რომლებიც ვითომ ევროკომისიის მოთხოვნების შესასრულებლად იქმნება –„მოქალაქეები“, „გირჩი“, „ნაცმოძრაობის“ რამდენიმე წევრი და კიდევ სხვა დეპუტატები.
–„ქართული ოცნების“ ლიდერები, იმ დღიდან, რა დღიდანაც საქართველოს დეოლიგარქიზაციის საკითხი დადგა დღის წესრიგში, აცხადებენ, რომ ოლიგარქები არიან მიშა სააკაშვილი, დავით კეზერაშვილი და კობა ნაყოფია. ამ ხალხს, ბიუჯეტიდან ბევრი ფული აქვთ უკანონოდ ნაჭამი და ჩემი აზრით, კორუფციონერები არიან და ამის გამო პასუხი უნდა აგონ. ოლიგარქის რამდენიმე განმარტება არსებობს, მაგრამ ერთი რამ ყველგან უცვლელია – ოლიგარქს ხელისუფლებაზე გავლენა უნდა ჰქონდეს. გამოდის, რომ ირაკლი ღარიბაშვილი, ირაკლი კობახიძე, მამუკა მდინარაძე და სხვები გვიმტკიცებენ, რომ სააკაშვილს ციხიდან, ძებნილ კეზერაშვილს და ნაყოფიას ამ ხელისუფლებაზე აქვთ გავლენა. ნახეთ, რა აბსურდულ სიღრმეებში წავიდნენ ეს საცოდავები?!
– მართლა კარგი მიგნებაა. ძალიან დიდი აბსურდია. გვიცხადებენ, რომ ეს სამი კაცი მართავს ქვეყანას? მაშ, თვითონ რას აკეთებენ? ოღონდ ბიძინა ივანიშვილი არ ახსენონ, ოღონდ ოლიგარქის კონტექსტში მისმა სახელმა არ გაიჟღეროს, მზად არიან ნებისიმიერი სისულელე ილაპარაკონ და აკეთონ. ყველაფერს აკეთებენ ეს გამყიდველები, რომ ოკუპანტი რუსეთის ინტერესები გაატარონ ქვეყანაში. ლამის ხელით მართვაზე გადავიდნენ უკვე. კრემლის დასმული ეს ხალხი თუ არ მოვიშორეთ, ყველაფერს დავკარგავთ, მალე სამშობლო აღარ გვექნება. ეგზინტენციალური გამოწვევის წინაშეა ჩვენი ქვეყანა და ამას უნდა მიხვდეს ხალხი.
კომენტარები