თურქეთის პრეზიდენტი რეჯეფ ტაიპ ერდოღანი სამხრეთ კავკასიაში „6 ქვეყნის პლატფორმის“ შექმნის ინიციატივით გამოდის. მისი თქმით, ეს გაერთიანება ქვეყნებს შორის თანამშრომლობის გაღრმავებისთვის უნდა შეიქმნას. ამ თემასთან დაკავშირებით ჟურნალისტი ნუგზარ რუხაძე სოციალურ ქსელში პოსტს აქვეყნებს, სადაც აღნიშნავს, რომ ასეთი თანამშრომლობის იდეა წლების წინ პროფესორმა ზურაბ ხონელიძემ წამოაყენა:
„პრესაში ვკითხულობ ინფორმაციას: თურქეთის პრეზიდენტის განცხადებით, სამხრეთ კავკასიის რეგიონში, შესაძლებელია, შეიქმნას „ექვსეულის პლატფორმა“ რეგიონის ქვეყნებს შორის თანამშრომლობის გასავითარებლად, რომელშიც იქნებიან აზერბაიჯანი, თურქეთი, რუსეთი, ირანი, საქართველო და, სურვილის შემთხვევაში, სომხეთი. ახლა, გამოვა, რომ იდეა ეკუთვნის თურქეთის ახლანდელ ლიდერს, რაც, სულ მცირე, ელემენტარული უსამართლობა იქნება საქართველოს მიმართ, რადგან ეს იდეა ჯერ კიდევ მე-20 საუკუნის დასასრულს გაჟღერდა აფხაზეთის კონფლიქტის შემდეგ, და მისი ავტორია პროფესორი ზურაბ ხონელიძე. ახალი სამეზობლო პოლიტიკა და რეგიონული თანამშრომლობის ეს ახალი ფორმატი მის ტრილინგვისტურ (ქართული, ინგლისური, რუსული) წიგნშია აღბეჭდილი! ამ საყურადღებო იდეის განმეორებითი ფართომასშტაბიანი პრეზენტაცია მოხდა 2013 წელს, საქართველოს მეცნიერებათა აკადემიაში, სადაც დაწვრილებით გაჟღერდა იდეის რაციონალურობა და სიკეთე სამხრეთ კავკასიისთვის, კერძოდ, და მთელი მსოფლიოსთვის, ზოგადად. ზურაბ ხონელიძის წიგნში ხაზგასმულია, რომ აღნიშნული შინაარსის გეოპოლიტიკურ ფორმატს, შეიძლება, ჰქონდეს არა მხოლოდ სექსტეტის სახე, არამედ, კვინტეტის, კვარტეტის ან ტერცეტის ფორმაც, ანუ ისეთი, რომელიც გარკვეულ ისტორიულ ეტაპზე იქნება რეგიონში არსებულ მდგომარეობაზე მორგებული. ერთი სიტყვით, მსოფლიო, ალბათ, მოიგებს, თუ სამხრეთკავკასიური გეოპოლიტიკური სივრცის გაშლას და გაერთიანებას შეძლებს რეგიონში არსებული პრობლემების მოსაგვარებლად, მათ შორის, არსებული კონფლიქტების გასამკლავებლად, თუმცა, დასანანი იქნება, თუ ეს ხონელიძისეული იდეა არ მიეწერება მის ავტორს.
ხაზს გავუსვამ იმასაც, რომ ანალოგიური იდეების განხორციელების მცდელობა წინათაც არ აკლდა სამყაროს, თუმცა, მისი მეცნიერული კონკრეტიზაცია და მისი განხორციელების სპეციფიური დეტალები არასდროს არ ყოფილა დამუშავებული ისეთი პროფესიონალიზმითა და რუდუნებით, როგორც ეს ქართველმა პოლიტმეცნიერმა და დიპლომატმა მოახერხა.
ეს იდეა ნიშნავს სამხრეთ კავკასიის, როგორც ახალი სამშვიდობო სივრცის, შექმნას, სადაც ხონელიძის თქმით, პრიორიტეტული მნიშვნელობა ენიჭება საქართველოს. დაბოლოს, კიდევ ერთი რამ: ქართული სიტყვის „სივრცე“ შეგნებული პოლიტიზაცია და მისი გამოყენება სასარგებლო გეოპოლიტიკურ კონტექსტში ზურაბ ხონელიძის გამოძერწილია და მისივე საკუთრებაში უნდა დარჩეს. მისი შესაბამისი გამოყენება კი, ჩვენს ეროვნულ და, ცხადია, საერთაშორისო დიპლომატიურ ძალებს უნდა მივანდოთ“
კომენტარები