სასამართლო-სამედიცინო ექსპერტი მაია ნიკოლეიშვილი, “კვირის პალიტრასთან” ამბობს:
როცა მიშა ვაკეში მაჟორიტარობაზე იყრიდა კენჭს. მეუბნებოდნენ, გვერდში დაგვიდექიო, მაგრამ ვამბობდი, არ მინდა პოლიტიკა-მეთქი. “ვარდების რევოლუციამდე” ორჯერ პრეზიდენტ ედუარდ შევარდნაძესთან მქონდა შეხვედრა და ვამბობდი, აქ რაღაც მზადდება-მეთქი. საიდან გაქვს ეს ინფორმაციაო, მკითხა, ასე ჯდება ეს მოზაიკა-მეთქი და ვუთხარი ჩემი აზრი. მესმისო. შევარდნაძეს ვთხოვდი, პრეზიდენტს დაუქვემდებარე ექსპერტიზის ბიურო-მეთქი. ეს სისტემა შევარდნაძის დროს არის შექმნილი, ამერიკელებთან ერთად. შევარდნაძე არასოდეს ერეოდა ჩვენს საქმეში, როცა დამჭირდა, ორჯერ შევხვდი მას, 40 წუთით და მაშინ მთავრობის სხდომაზეც გაიტანეს საკითხი რეფორმირების შესახებ. ის ფორმა, რითაც დღეს მუშაობს ექსპერტიზა, მაშინდელია, ერთი განსხვავებით – უნდა შექმნილიყო სათათბირო ორგანო, ბორდი, მაგრამ ეს არ მოხდა. ამის მერე მუშაობდა ექსპერტიზის ბიუროში ლევან სამხარაული, მერე ის მოკლეს და დაერქვა მისი სახელი. ვთვლიდი, ერთი ადამიანის ხელში ამხელა რამის ჩადება არ შეიძლებოდა, ეს ბირთვული ჩემოდანივით არის, ბორდი ამას აუცილებლად დააბალანსებდა, რომელიც იქნებოდა გარედან მოსული ადამიანებით დაკომპლექტებული. მაშინ, შევარდნაძეს რომ ვუთხარი, იქნებ პრეზიდენტს დაექვემდებაროს-მეთქი, მითხრა, დღეს მე ვარ პრეზიდენტი და ამას კი მთხოვ, მაგრამ ხვალ შეიძლება ისეთი ვინმე გახდეს პრეზიდენტი, სანანებელი გაგიხდეს ეს თხოვნაო, ბორდში გაითვალისწინეთ პრეზიდენტის წარმომადგენელიო. დღეს სამხარაულის ექსპერტიზის ბიურო მხოლოდ პრემიერს ექვემდებარება. ეს მოხდა სააკაშვილის დროს, მაგრამ ბორდი არ შექმნეს.
ზოგადად, ძალიან წინააღმდეგი ვიყავი, სააკაშვილი ხელისუფლებაში მოსულიყო, ვიცოდი, ეს კატასტროფა იყო, მაგრამ ქართველმა ხალხმა ასე ისურვა. თუ გახსოვთ, ორსული ქალი მოკლეს სპეცოპერაციის დროს, მიშამ ნულოვან ტოლერანტობაზე დაიწყო მაშინ საუბარი. მე კი მის კრიტიკაზე გადავედი და ვთქვი, რაც ხდება, ეს დაუშვებელია-მეთქი. მერე იყო ზურაბ ჟვანიას საქმე, რის გამოც ისინი მკაცრად გავაკრიტიკე.
არ ელოდნენ ამხელა ამბები თუ წავიდოდა ზურაბ ჟვანიას საქმეზე. მახსოვს, რა შიშით ვსაუბრობდით მაშინაც კი, როცა ჟვანიაზე ფილმი კეთდებოდა. მათ ვერ წარმოედგინათ ამის ქექვა. აბა, ვინ წარმოიდგენდა, რომ იმავე საღამოს ყვავივით დავჩხავლებდი. იმ დღესვე გამოვეხმაურე ვანო მერაბიშვილის განცხადებას, რომელმაც თქვა, რომ ვითომ ეს იყო CO-თი მოწამვლა. დილის რვა საათზე ამ დასკვნის დადება იყო პირდაპირ დაკვეთა ერთი მარტივი მიზეზით – ამ დროისთვის ლაბორატორიული კვლევა ჩატარებული ვერ იქნებოდა და გამორიცხული იყო, მერაბიშვილს ასე, უაპელაციოდ ეთქვა, რა იყო სიკვდილის მიზეზი. ჯერ კიდევ გაკვეთა არ იყო დამთავრებული, ექსპერტები აცხადებდნენ, რომ კონცენტრაცია CO-სი ორმოცი პროცენტიაო. მე ვთქვი, ეს არ არის სწორი, ეს კონცენტრაცია არ კლავს. მაშინ უნდა იყოს სამოცი, ან მეტი-მეთქი. მეორე დღეს ოფიციალური ექსპერტიზის შედეგები შეცვალეს და გამოაცხადეს, უსუპოვისა და ჟვანიას სისხლში CO სამოცი და მეტი პროცენტიაო. ჟვანიას საქმეზე მე არ ჩამიტარებია ექსპერტიზა, ახლოს ვინ მიმაკარებდა. არც ოჯახს მოუმართავს.
შეგახსენებთ, 2014 წელს მაია ნიკოლეიშვილი ზურაბ ჟვანიას გარდაცვალების საქმეზე, კიდევ ერთ დეტალეზე საუბრობდა:
ლევან ჩაჩუამ დღეს რომ დასკვნა უფრო ნათელი გახადოს, რა გგონიათ, ვინმე აპატიებს? ამდენი წელია, ყველაფერი აწყობილია მის დასკვნაზე, ახლა რაიმე რომ თქვას, ოდესმე აპატიებენ? რაც პირველად თქვა, ჯიუტად იმავეს იმეორებს. ახლა ხომ ვერ იტყვის, მაშინ შემეშალაო. აღმოჩნდა, რომ ზურაბ ჟვანიას ტუჩზე დაზიანება ჰქონდა, როგორც დასკვნაში წერია, ნასკდომი. ეს იყო მკვრივი საგნით მიყენებული ჭრილობა, რასაც ვერ ჩამოწერდი. ლევან ჩაჩუას ეს დაზიანება შეფასებული აქვს, როგორც სიკვდილისშემდგომი. კატეგორიულად არ ვეთანხმები, ეს არის სიცოცხლისდროინდელი დაზიანება. ჭრილობის ფერები, თავისი ნასკდომითა და სისხლჩაქცევით, დასკვნაში აღნიშნულია, როგორც მოწითალო – ეს აღწერილობა კი მეტყველებს იმაზე, რომ გვამს დაზიანება ჯერ კიდევ სიცოცხლეშივე ჰქონდა მიღებული. ტუჩზე დაზიანება დაფიქსირებულია, როგორც სიკვდილის შემდგომი, მაგრამ აღწერილია სიცოცხლისდროინდელის მორფოლოგიური სურათი. დასკვნაშიც ზუსტად ასე წერია, დაზიანება განვითარებული უნდა იყოს სიკვდილის დადგომიდან ახლო პერიოდშიო. თუ ასეა, ვსვამ კითხვას, რატომ უნდა განვითარებულიყო დაზიანება სიკვდილის დადგომიდან თუნდაც ახლო პერიოდში, რამდენადაც ვიცით, იმ სახლში ორნი გაიგუდნენ, ნუთუ იქ კიდევ მესამე იყო, ვისაც ჟვანიასთვის დაზიანების მიყენება შეეძლო? გამოდის, რომ ვიღაც მართლა ყოფილა და ჩაჩუამ იცოდა, ვინც”.
კომენტარები