15 მაისის აქციის გაუქმების შესახებ, “ენმ”-ის ლიდერმა, ნიკა მელიამ, დღეს გააკეთა მოკლე განცხადება და თქვა, ისედაც ცხადია, რომ აღარ არის ის მოცემულობა, აქციის ჩატარება რომ გახდეს საჭიროო.
რა შეიცვალა მარტის (როცა აქცია დაიგეგმა) მერე? – გარდა იმისა, რომ ნიკა მელია და გიორგი რურუა გამოვიდნენ ციხიდან? ვადამდელი არჩევნები დაინიშნა? იქნებ, სასამართლო სისტემის შეცვლის რეალური შანსი გაგვიჩნდა? არც ერთი და არც მეორე, შეიცვალა მხოლოდ ის, რომ ეს აქცია ნაციონალურ მოძრაობას “შეეტენა” და პარტიების უმეტესობა პარლამენტში გადაბარგდა.
სწორედ, ამას წერდა “ალია” ჯერ კიდევ აპრილში:
ანი დვალიშვილი:
“15 მაისის აქცია ნაციონალურ მოძრაობას „შეეტენა“ და მთავარი ოპოზიციური ძალა მის „გამოძრობას“ ჯიუტად ცდილობს.
პარლამენტში შესული პარტიები აქციაზე გასვლას აღარ აპირებენ. მიზეზი მარტივია – რა უნდა უთხრან ამომრჩეველს, პარლამენტში ვართ, მაგრამ მაინც ვაპროტესტებთო? გარეთ რეალურად თაკო ჩარკვიანი, ლეიბორისტები და ნაციონალები დარჩნენ. ეს სამეული კი 10 ათასი კაცის მოგროვებასაც ვერ მოახერხებს და როგორც მმართველი გუნდის, ისე დანარჩენი ოპოზიციის დასაცინი გახდებიან. ამიტომ, ნაცმო ძალიან ცდილობს, 15 მაისის აქციაზე სხვა პარტიების დაითანხმოს და თუ ხალხი ვერ მოგროვდება (და ვერ მოგროვდება), ოპოზიცია ერთმანეთისკენ ხელის გაშვერას არ დაიწყებს და ნაცებს არავინ დააყვედრის, პარლამენტში რომ არ შეხვედით, ამომრჩეველმა ზურგი იმიტომ გაქციაო.”
როგორც ჩანს, “ენმ”-მა ვერ მოახერხა დანარჩენი პარტიების დარწმუნება, ან როგორ მოახერხებდა? პარალელურად, სააკაშვილი “ენმ”-ის პარლამენტში შესვლის მომხრეა და შესაბამისად, ვერ იქნებოდა 15 მაისის აქციის მომხრე. რა ბედი ელით პარლამენტის შენობის გვერდით, კარვებში მსხომ ახალგაზრდებს, რომლებიც ვადამდელ არჩევნებს ითხოვენ 1 ნოემბრიდან მოყოლებული დღემდე – უცნობია.
ასე რომ, დღეს უკვე შეგვიძლია ვთქვათ, “ენმ”-მა მოახერხა და “შეტენილი” “გამოიძრო”. აქა-იქ უკვე ისმის ნაციონალური მოძრაობის წევრების ხმები, რომ ეს არასწორია და აქცია არ უნდა გაუქმებულიყო, მაგრამ, როგორც ჩანს, მათი ხმა არ იყო გადამწყვეტი. მართალია, პარტია დანარჩენი ოპოზიციის დასაცინი აღარ იქნება, მაგრამ ამჯერად, მას “ქართული ოცნება” დასცინებს, გაუქმებული აქციის გამო…. საითაც გავიქეცი, იქეთ წავიქეციო, ასე იყო, ამ აქციის ამბავი…
კომენტარები