“რუსთავი 2-ის” გადამღები ჯგუფი, რომელიც მიკოლაევში იმყოფება, დაბომბვას გადაურჩა – სულ ცოტა ხნის წინ დავით კაკულია და ვაჩე გოგოლაშვილი რუსული ავიაციის მიერ დაბომბილი საცხოვრებელი კორპუსის გადასაღებად მივიდნენ, როდესაც მორიგი თავდასხმა დაიწყო.
“გაგვიმართლა, დაახლოებით 100 მეტრში ჩამოვარდა მორიგი ჭურვი, რომელიც მოხვდა საცხოვრებელ კორპუსს, რამდენიმე წუთი გვქონდა გადასაღებად…
მანამდე, კორპუსებთან კიდევ 2 რაკეტა ჩამოვარდა, იყვნენ დაღუპულები, ამ სიტუაციის გადასაღებად მივედით იქ, თუმცა იქ ყოფნის პერიოდში რუსულმა არმიამ კიდევ გაისროლა რამდენიმე რაკეტა და ჩვენ ბედნიერი შემთხვევის წყალობით გადავრჩით,” -ამბობს დავით კაკულია.
მისივე ინფორმაციით, კორპუსის დაბომბვის შედეგად, სავარაუდოდ, ბევრი დაჭრილია, გადამღებ ჯგუფს ტერიტორია მალევე დაატოვებინეს, მოსახლეობის დიდი ნაწილი კი თავშესაფრებში გადაიყვანეს.
“ჭურვი მოხვდა სახლს, ფანჯრები ჩაიმსხვრა გვერდით კორპუსებშიც. ჩვენი სახლი კი დაზიანდა. გადავრჩი, სადარბაზოდან წამოვედით სარდაფში, როცა დაბომბვა დაიწყო. მე არ ვიცი, პუტინი, საერთოდ, როგორ შეიძლება ასეთი იყოს, ადამიანი არ არის, გენოციდს ახორციელებს უკრაინაში,”- აცხადებს ქალაქის ერთ-ერთი მკვიდრი.
კომენტარები