ირლანდიის დედაქალაქ დუბლინიდან საქართველოს 32 მოქალაქე დაადეპორტეს. ამის შესახებ ინფორმაციას ადგილობრივი მედია ავრცელებს.
მანამდე, საქართველოს მოქალაქეებს უნებართვოდ ყოფნის გამო, ქვეყნის დატოვების შესახებ მოთხოვნა მიიღეს, ხუთშაბათს ღამით კი დუბლინიდან თბილისში ჩარტერული რეისით ჩამოიყვანეს.
ეს იყო პირველი ოპერაცია, რომელიც მთავრობის მიერ ნოემბერში ხელმოწერილი ხელშეკრულებით ჩატარდა.
“ჩემთვის და ამ მთავრობისთვის მთავარი პრიორიტეტია, რომ ჩვენი საიმიგრაციო კანონები იყოს აღსრულებული. ადამიანებს უფლება აქვთ ნდობა ჰქონდეთ ჩვენი საიმიგრაციო სისტემის მიმართ და უნდა არსებობდეს შედეგები იმ პირებისთვის, რომლებიც უარს იტყვიან სახელმწიფოს დატოვებაზე, როცა ამას მოსთხოვენ. ჩვენ გვაქვს წესებზე დაფუძნებული სისტემა საერთაშორისო დაცვის განმცხადებლებისთვის. იმისათვის, რომ წესებს ჰქონდეს მნიშვნელობა, ისინი უნდა აღსრულდეს. მომავალში დაგეგმილი იქნება შემდგომი ფრენები,” – განაცხადა იუსტიციის მინისტრმა ო’კალაგანმა.
ირლანდიიდან დეპორტირებულია 28 კაცი, სამი ქალი და ერთი ბავშვი, რომელიც მშობლებთან ერთად იმყოფებოდა. დეპორტირებულებთან ერთად, ბორტზე იმყოფებოდა ადგილობრივი პოლიცია, სამედიცინო პერსონალი, თარჯიმანი და უფლებადამცველი.
კომენტარები