აშშ-ის არჩეული პრეზიდენტისთვის, დონალდ ტრამპისთვის უკრაინის ომის საკითხი ყველაზე აქტუალური საერთაშორისო საკითხია და ის ნამდვილად შეძლებს რუსეთის ლიდერის, ვლადიმერ პუტინის შეჩერებას. თუმცა, საშიშროება ის არის, რომ ტრამპის ვადის ამოწურვის შემდეგ, პუტინი ხელახლა შეტევას შეძლებს, – ამის შესახებ უკრაინის პრეზიდენტმა, ვოლოდიმირ ზელენსკიმ ამერიკელ პოდკასტერ ლექს ფრიდმანთან ინტერვიუში განაცხადა.
მისი თქმით, დონალდ ტრამპისთვის უკრაინის ომის თემა ძალიან მნიშვნელოვანია.
“მან ტელეფონზე მითხრა, რომ ელოდება ჩვენს შეხვედრას, ჩემი ვიზიტი იქნება პირველი ან ერთ-ერთი პირველი, ვიცი, რომ მას აქვს საკუთარი ამერიკული კითხვები, მაგრამ ვფიქრობ, რომ საერთაშორისო დონეზე ჩვენი საკითხი ერთ-ერთია ყველაზე აქტუალური პრეზიდენტი ტრამპისთვის“, – აღნიშნა ზელენსკიმ.
მისი თქმით, ტრამპის ხედვა უკრაინისთვის მნიშვნელოვანია, ვინაიდან „მას შეუძლია შეაჩეროს პუტინი, რადგან პუტინს ეშინია მისი. ფაქტია“.
ამასთან, ზელენსკიმ აღნიშნა, რომ ტრამპი სამუდამოდ არ მოსულა ხელისუფლებაში.
“ტრამპი არის დემოკრატიული ქვეყნის პრეზიდენტი და ის არ მოდის უვადოდ. ის არ არის პუტინი და არ მოვა 25 წლით. მოვა თავისი ვადით. მაგალითად, მოვიდა 4 წლით და მეხუთე წელს პუტინი მოვა ომით”, – აღნიშნა ზელენსკიმ.
მისი თქმით, პუტინი არის მკვლელი, მაგრამ არა სულელი.
“ის მოემზადება, გაითვალისწინებს თავის შეცდომებს, ექნება ბევრი იარაღი და ეყოლება ძალიან დიდი ჯარი. გგონიათ, რომ დაბრუნდება და მხოლოდ ჩვენთან იბრძოლებს? ის გაანადგურებს ყველაფერს მის გარშემო და თუ არსებობს რისკი, რომ ტრამპმა დატოვოს ნატო-ს, პუტინი გაანადგურებს ევროპას”, – აღნიშნა ზელენსკიმ.
კომენტარები