აშშ-ის პრეზიდენტმა, დონალდ ტრამპმა რუსეთის წინააღმდეგ ომში მყოფ უკრაინას სამხედრო დახმარება დროებით შეუჩერა. გადაწყვეტილება, რომელიც პრეზიდენტს და მის მრჩევლებს შორის თეთრ სახლში გამართულ შეხვედრებზე იქნა მიღებული, ძალაში უკვე შევიდა და ის $1 მილიარდზე მეტის ღირებულების სამხედრო შეიარაღებას ეხება. როგორც წყაროები Bloomberg-თან ამბობენ, გადაწყვეტილება მანამ იმოქმედებს, სანამ უკრაინის პრეზიდენტი მსოფლიოს არ დაანახვებს, რომ რუსეთთნ მოლაპარაკებებისთვის მზადაა.
დონალდ ტრამპის ეს გადაწყვეტილება ცუდია უკრაინისთვის, ხოლო კარგია რუსეთისთვის, რადგან თუკი დახმარება დიდი ხნით დაპაუზდა, უკრაინა, რომელიც, დიდწილად, სწორედ ამერიკულ სამხედრო დახმარებაზე არის დამოკიდებული, სავარაუდოდ, ბრძოლას ისეთივე შემართებით ვერ გააგრძელებს, როგორც მანამდე, რაც ვლადიმირ პუტინის წისქვილზე ასხამს წყალს. თუკი რუსეთის პრეზიდენტმა უპირატესობა იგრძნო და უკრაინის უფრო დიდი ტერიტორიის დაპყრობის საშუალება დაინახა, შესაძლოა, სამშვიდობო მოლაპარაკებები ჩაიშალოს და ომი გაგრძელდეს.
ის, რასაც დონალდ ტრამპი უკრაინის მიმართულებით აკეთებს, გარკვეულწილად, უპრეცედენტო გადაწყვეტილებაა. ბოლო წლებში, სამხედრო შეიარაღების ნაწილის მიწოდება დროებით პრეზიდენტმა ჯო ბაიდენმაც შეაჩერა, ოღონდ ისრაელის მიმართულებით და ისიც, კონკრეტულად 1,000-კილოგრამიანი ჭურვების შემთხვევაში, რომლებიც, შესაძლოა, ღაზის სექტორში მცხოვრები მშვიდობიანი მოქალაქეების წინააღმდეგ ყოფილიყო გამოყენებული. თუმცა თუ ბაიდენის ეს ნაბიჯი დროებითი და ვიწროპროფილური იყო, შეიარაღების მიწოდების სრული შეწყვეტა, გარკვეულწილად, ულტიმატუმს ნიშნავს.
ამერიკის შეერთებული შტატების პრეზიდენტი წინააღმდეგობაში მოდის მის მთავარ სამხედრო მოკავშირე სახელმწიფოებთანაც. ჩრდილოატლანტიკური სამხედრო ალიანსის წევრი სახელმწიფოები უკრაინას აქტიურად ეხმარებიან, ხოლო საფრანგეთმა, გაერთიანებული სამეფომ, გერმანიამ და სხვა ქვეყნებმა ლონდონში გამართულ სამიტზე ვოლოდიმირ ზელენსკის უფრო დიდი მხარდაჭერა აღუთქვეს, მაგრამ თუკი ამერიკული სამხედრო დახმარება შეჩერდა, უკრაინის ჯარში არსებული სამხედრო შეიარაღების დეფიციტის შევსება, ევროპელებს გაუჭირდებათ.
კომენტარები