დღეს მამა გრიგოლ მთვარელიშვილის ქალიშვილი, 14 წლის სალომე დაკრძალეს. ამ ტრაგედიაზე სოციალური ქსელის მომხმარებელი ნინო ჩიტაშვილი ემოციურ წერილს აქვეყნებს.
„დღეს ვნახე, როგორ იწვა თეთრ სასახლეში თეთრი და საოცრად ლამაზი გოგო……როგორ ულოცავდა შვილგარდაცვლილი დედა სხვა დედებს შვილებს… როგორ ამშვიდებდნენ დაგარდაცვლილი დედმამიშვილები ერთმანეთს…
დღეს მოვისმინე, როგორ სთხოვდა მამაო ღმერთს, მიეტევებინა მისი შვილისათვის ერთადერთი ცოდვა, რომ მისმა გარდაცვალებამ სხვა ადამიანს უდიდესი განსაცდელი მოუვლინა და გვთხოვდა, არასდროს განგვეკითხა, რამეთუ არავინ ვიცით რა ტრიალებს სხვის გულში…
დღეს მოვისმინე, როგორ სთხოვდა მამაო ადამიანებს,რომ არავის და არაფრის გამო არ ღირს გაბოროტება, რომ ერთადერთი, რაც გადაგვარჩენს სიყვარული და ერთმანეთის გვერდით დგომაა.
დღეს მოვისმინე, როგორ სთხოვდა მამაო მრევლს, რომ კი არ შეიცოდონ, არამედ უფრო მეტი სიყვარული გაუზიარონ…
დღეს ვნახე, როგორ იდგა საათობით თეთრ სასახლესთან ავადმყოფი ბიჭი და მომეჩვენა, რომ მისი ცრემლი იყო ძალიან გულწრფელი…
დღეს ვნახე ერთად: სიკვდილი, სიკეთე, სილამაზე, სიყვარული და სიძლიერე… და დღეს ისე გავიზარდე… არ მგონია, რამე ვნახო კიდევ ამაზე მეტი, ჩემი ცხოვრების მანძილზე.” – წერს ნინო ჩიტაშვილი.
რამდენიმე დღის წინ გურჯაანის მუნიციპალიტეტის სოფელ ვაზისუბანში მომხდარ ავტოსაგზაო შემთხვევას, 14 წლის სალომე მთვარელიშვილი ემსხვერპლა. გავრცელებული ცნობით, გზაზე მოპედით დები გადაადგილდებოდნენ, რა დროსაც მათ, მსუბუქი ავტომობილი შეეჯახა. ერთი მათგანი ადგილზე გარდაიცვალა, ხოლო მეორე თბილისში რეანომობილით გადაიყვანეს.
კომენტარები