დღეს რომის პაპი ლეო XIV ვოლოდიმირ ზელენსკის შეხვდება, – ამის შესახებ ვატიკანში განაცხადეს.
ვატიკანის ცნობით, საინაუგურაციო მესის შემდეგ რომის პაპი ლეო XIV უკრაინის პრეზიდენტთან, ვოლოდიმირ ზელენსკისთან პირად შეხვედრას გამართავს.
დღეს რომის ახალი პაპის, ლეო XIV-ის ინაუგურაციას სხვადასხვა ქვეყნის წარმომადგენლები ესწრებიან. კერძოდ, აშშ-ის დელეგაციას ვიცე-პრეზიდენტი ჯეი დი ვენსი ხელმძღვანელობს, ინაუგურაციას ასევე სახელმწიფო მდივანი მარკო რუბიო ესწრება.
სხვადასხვა ქვეყნის წარმომადგენლებს შორის, რომლებიც ინაუგურაციას ესწრებიან, არიან ისრაელის, პერუსა და ნიგერიის პრეზიდენტები; იტალიის, კანადისა და ავსტრალიის პრემიერ-მინისტრები; გერმანიის კანცლერი და ევროკომისიის პრეზიდენტი.
გუშინ „ფოქს ნიუსთან“ ინტერვიუში აშშ-ის სახელმწიფო მდივანმა, მარკო რუბიომ განაცხადა, რომ ვატიკანმა ძალიან კეთილშობილური შეთავაზება გააკეთა რუსეთსა და უკრაინას შორის ნებისმიერი ფორმატის შეხვედრის მასპინძლობის შესახებ.
კომენტარები