“დღეს ძებნა არ არის აუცილებელი. ეს ხდება რუსთაველზე ყოველდღე, ყოველ საღამოს” – ზურაბ ჯაფარიძე

კოალიცია ცვლილებებისთვის ერთ–ერთი ლიდერი, ზურაბ ჯაფარიძე, ციხიდან, სადაც წულუკიანის კომისიაზე არმისვლის გამო ზის, წერილს ავრცელებს:

ადამიანი, რომელიც გააზრებულად მზადაა იდეის გულისთვის აიტანოს ტანჯვა;

ადამიანი, რომელიც წელგამართული წინ აღუდგება ხორცშესხმულ ბოროტებას;

ადამიანი, რომელიც არ ეპუება და ქედს არ უხრის მასზე ბევრად ძლიერს და სასტიკს;

ადამიანი, რომელიც რთულ და საშიშ გარემოში ეძებს გამოსავალს, გადარჩენის გზას;

ადამიანი, რომელიც არ ტოვებს მეგობრებს გასაჭირში, მიუხედავად საფრთხისა;

ადამიანი, რომელიც მიუხედავად სირთულეებისა, ჯიუტად და შეუპოვრად მიიწევს მიზნისკენ;

ადამიანი, რომელიც გადის უამრავ ადამიანურ ტრაგედიას და იღებს წარმოუდგენელ მსხვერპლს დიადისთვის, იქნება ეს რაიმე პრინციპი თუ მიზანი;

ადამიანი, რომელიც არ ნებდება და არ უშვებს ხელებს დაბლა, როცა გარშემო უკვე ბევრი შეეგუა და გაჩერდა;

ადამიანი, რომელიც ბოროტებითა და უსამართლობით გარშემორტყმული, ინარჩუნებს სიკეთის კეთების სურვილსა და უნარს;

ეს გვხდის ადამიანებად, ასეთი რაღაცების კეთება.

ამას ვეძებთ წიგნებში, სპექტაკლებში, ფილმებში.

ოღონდ დღეს ძებნა არ არის აუცილებელი. ეს ხდება რუსთაველზე ყოველდღე, ყოველ საღამოს. უბრალოდ მისვლა და დანახვაა საჭირო. იქ დგანან ასეთი ადამიანები. ეს ხდება სასამართლოებზე. ასეთი ადამიანია მზია ამაღლობელი. მაგრამ დანახვა გვიჭირს ან არ გვინდა, საკუთარი თავის რომ არ შეგვრცხვეს.

წინასწარ გარანტირებულ გამარჯვებას ფასი არ აქვს. ბრძოლა, მსხვერპლის გაღება, ტკივილი ადებს ყველა გამარჯვებას ფასს.

ამიტომ, ჩვენი გამარჯვება იქნება დიდი გამარჯვება.

ისტორიული და დაუვიწყარი.