“დავუშვათ, რუსეთი ვეღარ გაგვიწევს ფინანსურ დახმარებას, რა უნდა გავაკეთოთ?”– ასლან ბჟანია

დროებით ოკუპირებული აფხაზეთის, ე.წ პრეზიდენტის, ასლან ბჟანიას განცხადებით, რუსეთი “ძალიან რთულ ომშია” ჩართული და შესაძლოა, აფხაზეთს ფინანსურად ვეღარ დაეხმაროს.

ასლან ბჟანიას თქმით, თუ აფხაზეთი არის “დამოუკიდებელი სახელმწიფო”, მაშინ ეკონომიკური დატვირთვაც უნდა გააჩნდეს.

“ჩვენ ყველამ ვიცით, რომ სამართალდამცავი სააგენტოების, სახელმწიფო უწყებებში დასაქმებულების ხელფასები რუსეთის მიერ არის დაფინანსებული. რუსეთი ახლა ძალიან რთულ ომში არის ჩართული, რომლის ერთი დღეც 500 მილიონი დოლარი ღირს, რომ არ ვისაუბროთ ასობით და ათასობით დაღუპულზე. დავუშვათ, რომ რაღაც ეტაპზე რუსეთის ფედერაცია ვეღარ გაგვიწევს ფინანსურ დახმარებას. რა უნდა გავაკეთოთ ასეთ შემთხვევაში? არავის ვაშინებ, მაგრამ თუ დამოუკიდებელი სახელმწიფო ვართ, ეკონომიკური დატვირთვაც უნდა გვქონდეს. ჩვენ განვითარების მთავარი ვექტორი ტურიზმია, ამიტომ სასტუმროების მშენებლობა კარგია, მაგრამ 30-40-ჯერ მეტი უნდა აშენდეს”, – თქვა დროებით ოკუპირებული რეგიონის დე ფაქტო პრეზიდენტმა.

ბჟანიას თქმით, სასტუმროებისა და აპარტამენტების მშენებლობის შესახებ შესაბამისი კანონის დამტკიცება, მნიშვნელოვანი იქნება ეკონომიკური განვითარებისთვის.