თემურ ხვიბლიანი, რომელიც თავდაცვის სამინისტროში მსახურობს და ერთ-ერთი მძევლის, სამხედრო მოსამსახურის, დავით ხვიბლიანის ნათესავია, მედიასთან ბრალდებებს უარყოფს და გავრცელებულ ინფომაციას სიცრუეს უწოდებს.
„ის ბრალდებები, რომელიც გაჟღერდა კონკრეტული ტელევიზიების და პირების მიერ, არის აბსოლუტური ტყუილი, ცილისწამება, ცრუ ბრალდება. ასევე, თურმე მე ვყოფილვარ თავდამსხმელი, რომელიც შეიჭრა ბანკში, თურმე თანამზრახველი მყოლია მოქმედი სამხედრო დავით ხვიბლიანი – ვიმეორებ ეს არის აბსოლუტური ტყუილი, ცრუ ბრალდება, გადაუმოწმებელი ინფორმაცია, რომელიც გაჟღერდა სხვადასხვა ტელევიზიებში.
დამიკავშირდა ერთ-ერთი ჟურნალისტი და ცივად, ღიად მეუბნება, რომ თქვენთან ინტერვიუს ჩაწერა მინდაო, ვკითხე რატო, მან მიპასუხა „თქვენ გდებენ ბრალს ზუგდიდში, საქართველოს ბანკზე ძარცვაში, ამოგიცნესო“, ვუთხარი იმ ქალბატონს, ეს თქვენი წყარო გადაამოწმეთ, ნუ აჟღერებთ გადაუმოწმებელ ინფორმაციას და ნუ შეგყავთ საზოგადოება შეცდომაში.
თამამად ვაცხადებ და ვამბობ, მეამაყება დავით ხვიბლიანი, იქიდან გამომდინარე, რომ სრულიად შემთხვევით აღმოჩნდა ბანკში, არ იმყოფებოდა თვითდათხოვნაში, იმყოფებოდა დისტანციურ რეჟიმზე, რომელმაც მიიღო შეტყობინება ხელფასის ჩარიცხვაზე, ადგა ჩავიდა ბანკში, გარკვეული დროის შემდეგ, შემოვარდა მძარცველი.
მაგ. დავით ხვიბლიანის დიდი დამსახურებაა, რომ მძევლები უვნებლად, ჯანმრთელები და ცოცხლები გამოვიდნენ ბანკიდან. ლომის წილი მიუძღვის დავით ხვიბლიანს, მძევლების უსაფრთხოდ გამოსვლაში. მოვითხოვ, გარკვეული დოზით ბოდიშის მოხდასაც,“- განაცხადა თემურ ხვიბლიანმა.
შეგახსენებთ, რომ ზუგდიდში ბანკზე მომხდარი თავდასხმის შესახებ, სხვადასხვა ინფორმაცია ვრცელდებოდა. მათ შორის, ერთ-ერთი მედიასაშუალება ირწმუნებოდა, რომ მძევალი, სამხედრო დავით ხვიბლიანი ფორმალური მძევალია და რეალურად, თავდამსხმელის მოკავშირეა. თავად თავდამსხმელი კი დავით ხვიბლიანის ნათესავი, თავდაცვის სამინისროს წარმომადგენელი თემურ ხვიბლიანია.
კომენტარები