სტრასბურგში, პლენარულ სესიაზე, ევროპარლამენტარმა ტობიას კრამერმა საქართველოს შესახებ ისაუბრა და მოუწოდა, რომ დამოუკიდებელი საერთაშორისო გამოძიება მოიწვიონ “ქართული ოცნების” მიერ ქიმიური იარაღის გამოყენების შესახებ.
მისივე მოწოდებით, დე ფაქტო მმართველ ივანიშვილზე და მის ყველა თანამზრახველზე ნამდვილი და მიზანმიმართული სანქციები უნდა დააწესონ.
წარმოიდგინეთ ნივთიერება, რომელიც სუნთქვის უნარს გართმევთ, კანს გწვავთ, ხველასა და ღებინებას იწვევს და არა მხოლოდ რამდენიმე წუთით ან საათით, არამედ დღეებისა და კვირების განმავლობაში. ეს არის პირველი მსოფლიო ომის დროინდელი ქიმიური იარაღის, „კამიტის“ შედეგები. დღეს ჩვენ დამოუკიდებელ ცნობებს ვკითხულობთ, რომლის მიხედვითაც, სავარაუდოდ, მისი ევროპაში გამოყენება კვლავ მოხდა. ამ ცნობების თანახმად, საქართველოს ხელისუფლებამ იგი წყლის ჭავლში შეურია და გამოიყენა არა დამპყრობელი არმიის, არამედ საკუთარი მოქალაქეების წინააღმდეგ. და რატომ? იმიტომ, რომ უკვე წელიწადზე მეტია, რაც ქართველი ხალხი დემოკრატიული რეჟიმის, კანონის უზენაესობის და რაც მთავარია, ევროპული მომავლისთვის, მშვიდობიანი პროტესტი გამართვას ბედავს.
მოდით, მოვიწვიოთ დამოუკიდებელი საერთაშორისო გამოძიება „ქართული ოცნების“ მთავრობის მიერ მსგავსი ქიმიური იარაღის გამოყენების შესახებ. მოდით, საბოლოოდ ნამდვილი და მიზანმიმართული სანქციები დავაწესოთ, არა მხოლოდ დიპლომატიური პასპორტის მფლობელ რამდენიმე პირზე, არამედ თავად დე ფაქტო მმართველ ივანიშვილზე და მის ყველა თანამზრახველზე, რომლებიც ასეთ საშინელ დანაშაულში მონაწილეობენ. ქართველები ყოველდღიურად ნამდვილ სიმამაცეს იჩენენ და მოდით, ჩვენს იგივე გავაკეთოთ,” – აღნიშნა ევროპარლამენტარმა. (თარგმანი: Ipn.ge)
კომენტარები