“დაცვის პოლიციის ძალით კი არა, კბილებამდე შეიარაღებული არმიით გარშემორტყმულმა და რუსული ჯარით ზურგგამაგრებულმა აბაშიძემ ვერ შეინარჩუნა ხელისუფლება!“- აკაკი გვიანიძე

„საკრებულოს წევრად არჩევის დღიდან ვცდილობ ბათუმის მერიასთან კონსტრუქციულ თანამშრომლობას,“- წერს სოციალურ ქსელში ბათუმის მუნიციპალიტეტის საკრებულოს, პარტია „საქართველოსთვის“ არჩეული წევრი აკაკი გვიანიძე.
გვიანიძე ამბობს, რომ მის ინიციატივებს მერია მუდმივად დუმილით ან უარით ხვდება.
„ვუგზავნი ოფიციალურ წერილებს საქმიანი წინადადებებით ან ინფორმაციის გამოთხოვნის მიზნით. შედეგად:
1. საერთოდ არ მპასუხობენ;
2. უკანონო უარს ვიღებ პასუხად;
3. საუკეთესო შემთხვევაში, სანახევროდ მპასუხობენ;

მეც ხომ “დესტრუქციული” ოპოზიცია არ ვარ?
არ შევჭრილვარ არც მერის კაბინეტში, არც მის მისაღებსა და სათათბიროში, ყვირილითა და ხმაურით არ დავდევ მერს და სხვა თანამდებობის პირებს,“- წერს აკაკი გვიანიძე და ბათუმის მერიის წარმომადგენლებს კანონისა და ინსტიტუტის პატივისცემისაკენ მოუწოდებს.
„რა ვქნა? საპასუხოდ გწეროთ ახალი წერილები და სასამართლოში ვიარო? პატივი ეცით კანონს და ინსტიტუტს! დაცვის პოლიციის ძალით კი არა, კბილებამდე შეიარაღებული არმიით გარშემორტყმულმა და რუსული ჯარით ზურგგამაგრებულმა აბაშიძემ ვერ შეინარჩუნა ხელისუფლება,“- წერს აკაკი გვიანიძე.