დანია ევროკავშირის პირველი ქვეყანაა, რომელიც კორონავირუსის ვაქცინაციის კამპანიას აჩერებს. ამის მიზეზად ის ფაქტი დასახელდა, რომ ქვეყნის მოსახლეობის უმეტესი ნაწილი უკვე აცრილია, ინფიცირებათა შემთხვევების რაოდენობა კი, კლებადი.
ჯანდაცვის ეროვნულმა საბჭომ განაცხადა, რომ დანია ვაქცინაციის პროცესს 15 მაისიდან შეწყვეტს.
„გაზაფხული მოვიდა, ჩვენ ახლა ვაკონტროლებთ ეპიდემიას და როგორც ჩანს, იგი იკლებს. ჰოსპიტალიზაციის მაჩვენებლები სტაბილურია და ველოდებით, რომ ისინი მალე შემცირდება. ამიტომ, ვაქცინაციის მასობრივ კამპანიას კორონავირუსის წინააღმდეგ ვწყვეტთ“, – თქვა ინფექციური დაავადებების დეპარტამენტის ხელმძღვანელმა ბოლეტ სობორგმა.
გავრცელებული ინფორმაციით, კამპანია, სავარაუდოდ, შემოდგომაზე კვლავ განახლდება – ექსპერტები ვარაუდობენ, რომ შემოდგომაზე შესაძლებელია, ვირუსის ახალი ტალღა წამოვიდეს და Covid 19-მა მუტაცია კვლავ განიცადოს.
დანია, ასევე, ჯანდაცვის დაწესებულებებში პირბადეების გამოყენების მოთხოვნებსაც ხსნის.
თებერვლის დასაწყისში, დანია ევროპაში პირველი ქვეყანა იყო, რომელმაც თითქმის ყველა საკარანტინო შეზღუდვა გააუქმა.
კომენტარები