დანგრეული შენობები და ხანძრები – ოკუპანტებმა კიევი დაბომბეს

24 მაისის ღამეს, რუსმა ოკუპანტებმა კიევზე მასირებული იერიშები მიიტანეს. თავდასხმის შედეგად დედაქალაქში რამდენიმე ადგილას ხანძარი გაჩნდა, დაზიანდა სამოქალაქო ინფრასტრუქტურა და საცხოვრებელი სახლები. ინფორმაციას უკრაინის საგანგებო სიტუაციების სახელმწიფო სამსახური  ავრცელებს.

უწყების ცნობით, მტრის მიერ განხორციელებული დარტყმების გამო, დარნიცკის რაიონში ცეცხლი გაუჩნდა ორსართულიანი საერთო საცხოვრებლის სახურავს, დაახლოებით 150 კვ.მ ფართობზე. ადგილზე მაშველები მოსახლეობის ევაკუაციასა და ხანძრის ლიკვიდაციას ახორციელებენ.

მძიმე ვითარებაა შევჩენკოს რაიონშიც, სადაც საჰაერო იერიშის შედეგად:

სკოლის მეორე სართულზე ხანძარი 300 კვ.მ ფართობზე გავრცელდა;

5-სართულიანი საცხოვრებელი კორპუსის ერთ-ერთ სადარბაზოში ჩამოინგრა კონსტრუქცია, რასაც 1-ლიდან მე-5 სართულამდე ხანძარი მოჰყვა;

დაფიქსირდა დარტყმა ბიზნესცენტრის შენობაზე, ცეცხლი გაუჩნდა ბაზრის ტერიტორიასაც;

ერთ-ერთ 9-სართულიან საცხოვრებელ სახლში ჭურვი მე-8 და მე-9 სართულებს შორის ჩავარდა — წინასწარი მონაცემებით, დაღუპულია ერთი ადამიანი.

უკრაინის საგანგებო სიტუაციების სახელმწიფო სამსახურის ინფორმაციით, ნგრევა და ხანძრები ფიქსირდება სხვა რაიონებშიც:

დნიპროს რაიონში: ცეცხლი გაუჩნდა კერძო საცხოვრებელ სახლს და ავტოფარეხების კოოპერატივის ტერიტორიას;

დესნიანკის რაიონში: დარტყმები დაფიქსირდა სავაჭრო ცენტრსა და სუპერმარკეტის შენობაზე, ხოლო ავტოფარეხების კოოპერატივში ხანძარი ხუთ ბოქსს მოედო;

სვიატოშინსკის რაიონში: ვრცელდება ინფორმაცია 9-სართულიან საცხოვრებელ კორპუსზე მოხვედრილი ჭურვის შესახებ.

ადგილებზე სალიკვიდაციო და სამაშველო სამუშაოები უწყვეტ რეჟიმში მიმდინარეობს.