“დანაშაული მძიმეა… მე მკითხავი არ ვარ” – ვოლსკი

“ალიამ” ჯერ კიდევ გუშინ გამოაქვეყნა ინფორმაცია იმის შესახებ, რომ ირაკლი ღარიბაშვილის მხარდამჭერები, მის შეწყალებას ითხოვენ. როგორ უნდა შეიწყალოს ის ყაველაშვილმა, როცა სასჯელის ის ნაწილიც არ აქვს მოხდილი, რომლის შემდეგაც შეწყალება შესაძლებელია, გაუგებარია. დღეს ოცნების ლიდერებმა ღარიბაშვილის შეწყალებაზე ისე გააკეთეს კომენტარები, არც ერთს არ უთქვამს, რომ კანონით, მას ჯერ შეწყალების თხოვნაც კი არ შეუძლია.

ოცნების ერთ–ერთი ლიდერი, გიორგი ვოლსკი:

“საკმაოდ რთულია მსჯელობა კონკრეტულ ადამიანზე, მის ბედზე, მის ოჯახზე, გინდა მხარდამჭერზე, იმ წარსულიდან გამომდინარე, რაც გვაკავშირებდა ერთმანეთთან – მეგობრობა და თანამშრომლობა. ეს ემოციური ნაწილია. რაც შეეხება პრაქტიკულ ნაწილს, ამაზე წინასწარ ვერაფერ ვერ გეტყვით. რთულია ამ თემაზე ლაპარაკი, მაგრამ დანაშაულია მძიმე და სასჯელიც არის შესაბამისი. მე მკითხავი არ ვარ – რას ვიზამთ, რას გავაკეთებთ. ჩემი ემოცია ერთია და დანაშაულის მიმართ სასჯელი მეორე.”