“დაისჯება თუ არა საქართველოს მოქალაქე, რომელიც მოკლავს რუს სამხედროს, რომელიც შეეცდება მის მოტაცებას და ცხინვალში წაყვანას?” – კითხვა იურისტებს

 ანტისაოკუპაციო მოძრაობის ლიდერი, დავით ქაცარავა:

“ჩემს დღევანდელ პოსტთან დაკავშირებით, რომელიც გუშინ სობისში გატაცების მცდელობას ეხებოდა,

გიორგი ნაფიშვილმა დასვა კითხვა, რომელსაც უცვლელად გთავაზობთ.მეც ძალიან მაინტერესებს ამ კითხვაზე პასუხი და იქნებ იურისტებმა კომპეტენტური პასუხი გაგვცენ. დიდი მადლობა წინასწარ.

შეკითხვა მაქვს იურისტებთან: საქართველოს კანონმდებლობით დაისჯება თუ არა საქართველოს მოქალაქე, რომელიც მოკლავს რუსეთის საოკუპაციო ჯარების სამხედრო პირს, რომელიც შეეცდება საქართველოს მოქალაქის მოტაცებას და ცხინვალში წაყვანას. გთხოვთ გამცეთ დასაბუთებული პასუხი.

გუშინ, 29 აგვისტოს, სოფელ სობისის მინდვრებში ადგილობრივი მაცხოვრებლები გასულები იყვნენ სანადიროდ ოკუპაციის ხაზის მიმდებარედ.

ისინი გადაადგილდებოდნენ ჩვენს “კონტროლირებად” ტერიტორიაზე, როდესაც რამდენიმე კილომეტრში მდებარე წინაგარის საოკუპაციო ბაზიდან მათ გასატაცებლად დაიძრა ოკუპანტების მანქანა.

ოკუპანტებმა გადმოკვეთეს მათ მიერვე დაწესებული ოკუპაციის ხაზი და დაედევნენ ახალგაზრდებს დასაჭერად.

საბედნიეროდ, მონადირეებმა მოახერხეს და დაუსხლტდნენ ოკუპანტებს, რომლებიც ჩვენს კონტროლირებად ტერიტორიაზე დაახლოებით 200 მეტრით შემოიჭრნენ.

იმაზე აღარ ვსაუბრობ, როგორ აგინებდნენ ოკუპანტები მონადირეებს, მნიშვნელოვანი ის არის, რომ ოკუპანტები თავს ძალიან კომფორტულად გრძნობენ ჩვენი ქვეყნის როგორც ოკუპირებულ, ასევე არაოკუპირებულ ნაწილში.”