საპარლამენტო უმრავლესობის წევრი შალვა პაპუაშვილი ნაციონალური მოძრაობის თავმჯდომარეზე, ნიკა მელიაზე, სოციალურ ქსელში წერს, რომ მან როგორც პოლიტიკოსმა თავი დაიმთავრა და წარმავალია ამქვეყნიური დიდება.
ამ პოსტით იგი გამოეხმაურა ნიკა მელიას ადვოკატების განცხადებას გირაოსთან დაკავშირებით.
“გირაო უნდა, მაგრამ ვერ ამბობს. ასეა, როცა თამასას ისეთ სიმაღლეზე წევ, რომელსაც ვერ აიღებ. არ ყოფნის გამბედაობა არც ქვეყნისთვის, არც საკუთარი თავისთვის. დაიმთავრა თავი როგორც პოლიტიკოსმა. ასე წარმავალია ამქვეყნიური დიდება”,- დაწერა შალვა პაპუაშვილმა.
“ნაციონალური მოძრაობის” თავმჯდომარის ნიკა მელიას ადვოკატი, გიორგი კონდახიშვილი აცხადებს, რომ მისი დაცვის ქვეშ მყოფის “გათავისუფლების გასაღები” ხელისუფლების ხელშია. მან მელიასთან ციხეში შეხვედრის შემდეგ განმარტა, რომ გირაოს გადახდაზე მელიას თანხმობა არ არის საჭირო.
“აბსოლუტურად არ არის საჭირო ნიკა მელიას თანხმობა არავითარ გირაოზე, ნებისმიერ დროს შეუძლია, ხელისუფლებამ მიმართოს სასამართლოს და ნიკა მელია თავისუფლდება სხდომათა დარბაზიდან. არც სამართლებრივად და არც სხვა მხრივ, ნიკა მელიას თანხმობა არაფერ შუაშია”, – განაცხადა გიორგი კონდახიშვილმა.
პარალელურად, ოპოზიციურმა პარტიებმა განაცხადეს, რომ ევროკავშირი მზად არის გადაიხადოს მელიასთვის შეფარდებული გირაოს საფასური – 40 ათასი ლარი.
კომენტარები