“დაგვპირდნენ, მაგრამ ოკუპანტებმა ზაპოროჟიეს ატომურ ელექტროსადგურზე ჟურნალისტები არ შეუშვეს“ – ზელენსკი

უკრაინის პრეზიდენტმა ვოლოდიმირ ზელენსკიმ  განაცხადა, რომ ზაპოროჟიეს ელექტროსადგურში ჩასულ მისიის ხელმძღვანელს შეუთანხმდა, რომ მისიაში აუცილებლად იქნებოდნენ უკრაინელი და საერთაშორისო ჟურნალისტები, თუმცა შეთანხმების მიუხედავად, ეს არ მოხდა. 

„კიევში შეხვედრისას, მისიის ხელმძღვანელს, ბატონ გროსის შევუთანხმდით, რომ მისიაში აუცილებლად იქნებიან უკრაინელი და საერთაშორისო ჟურნალისტები, რათა სამყარომ ნახოს სიმართლე და ის, თუ რა ხდება სინამდვილეში. სამწუხაროდ, ეს არ გაკეთდა, არადა დაპირება იყო. სამწუხაროდ, ოკუპანტებმა ჟურნალისტები არ შეუშვეს, მაგრამ შეკრიბეს პროპაგანდისტები.

საერთაშორისო ატომური სააგენტოს წარმომადგენლებმა ვერ დაიცვეს დამოუკიდებელი ჟურნალისტები, მაგრამ ვიმედოვნებთ, რომ თავად შეძლებენ სადგურზე არსებული ვითარების შესახებ სწორი დასკვნების გაკეთებას. რაც ყველაზე მთავარია, დაუყოვნებლივ უნდა მოხდეს სადგურის ტერიტორიის დემილიტარიზაცია, სადგური ჩვენმა სპეციალისტებმა სრულად უნდა აკონტროლონ. სამწუხაროდ, ატომური ენერგიის საერთაშორისო სააგენტოს ხელმძღვანელისგან ეს მოწოდებები ჯერ არ გაგვიგია“.