ჩვენ დისკრიმინაცია ჩავიდინეთ ღვანკითის და მარნეულის მოსახლეობის წინაშე, როდესაც ვაკე არ ჩაგვიკეტავს, მიუხედავად იმისა, რომ ვაკეშიც იყო ვირუსი – იაგო ხვიჩია

სახალხო დამცველობის კანდიდატი, იაგო ხვიჩია:

„კორონას პერიოდში სახალხო დამცველის ინსტიტუტის და ადამიანის უფლებების დაცვის თვალსაზრისით გამოცდა დადგა. ამ პერიოდში ადამიანის მთავარი უფლება, რაც დაირღვა, იყო ეჭვის საფუძველზე ადამიანების დაპატიმრება. ჩვენ იტალიიდან ჩამოსული ხალხი კარანტინში ჩავსვით. რატომ ჩავსვით ციხეში ადამიანები ეჭვის საფუძველზე? – ეჭვი გვქონდა, რომ მათ სხეულში იყო ვირუსი. შეშინებული იყო საზოგადოება, შეშინებული იყო მართლმსაჯულების სისტემა, შეშინებული იყო მედიცინა, გამოსავლად კი ვიპოვეთ ის, რომ ადამიანები წაგვეყვანა ციხეში, გამოგვეკეტა სახლში და საკუთარი უცოდინარობა ასე „გაგვეპრავებინა“. ბევრს შეიძლება ეს ეპატიოს, მაგრამ სახალხო დამცველს – არა! როგორც მართლმსაჯულების სისტემები ჩავარდა სამყაროში ბევრგან, ჩვენთან სახალხო დამცველის ინსტიტუტი სრულად ჩავარდა მაშინ, როცა მადლობას უხდიდა მთავრობას გატარებული ღონისძიებებისთვის. ჩემი განსხვავებაც ეს იქნებოდა, არცერთ შემზღუდავ ღონისძიებას მხარს არ დავუჭერდი. არ დავუჭერდი მხარს ჯერ ომად გამოცხადებას ვირუსთან ბრძოლის და მერე ავტომატებით დგომას რომელიღაც საზღვრებზე.

თუ რამე მართლა არის დისკრიმინაცია, ჩვენ დისკრიმინაცია ჩავიდინეთ ღვანკითის და მარნეულის მოსახლეობის წინაშე, როდესაც ვაკე არ ჩაგვიკეტავს, მიუხედავად იმისა, რომ ვაკეშიც იყო ვირუსი, მაგრამ ღვანკითში და მარნეულში იმავეს ვაკეთებდით, მაგრამ ხმა არავის ამოუღია. მე რასაც ვამბობ, ის რომ მართალი იყო, დღეს ცხადია. იმ დროს, იმ ვირუსთან დაკავშირებით ჩვენ რაც ვიცოდით, ეს საკმარისი იყო თუნდაც იმისთვის, რომ ჩვენ ყველა კანონის და მართლმსაჯულების შესრულებაზე უარი კი არ გვეთქვა, მინიმუმ პროცედურები დაგვეცვა და სამართლიანი სასამართლოს უფლება მოგვეწყო უდანაშაულო ადამიანისთვის და არა ის, რომ კონვეიერული წესით საკნებში გადაგვეყვანა და ამ საკნებისთვის პალატები დაგვერქვა. მოცემულ შემთხვევაში ვიცოდით მხოლოდ ის, რომ ადამიანები იტალიაში იყვნენ წასულები, აეროპორტში ვიჭერდით მათ და აბასთუმანში მიგვყავდა სასამართლოს გარეშე“