ფოტო – ნეტგაზეთი
სარეკლამო კომპანია “ლიმონში” პოლიცია შევიდა , პავილიონში ჩხრეკა მიმდინარეობს – ინფორმაციას “ნეტგაზეთი” ავრცელებს. სოციალურ ვრცელში ვრცელდება ფოტოებიც.
გამოცემის ცნობით, თანამშრომლებისთვის პოლიციას არ განუმარტავს ჩხრეკის მიზეზი, მხოლოდ სასამართლოს ორდერი წარუდგინეს და უთხრეს, რომ ყველაფერს მოგვიანებით გაიგებდნენ. თანამშრომლები აცხადებენ, რომ ვერ უკავშირდებიან კომპანიის დირექტორ გიორგი ოკმელაშვილს.
მათი თქმით, ყველა თანამშრომელს პოლიციამ ტერიტორია დაატოვებინა, ჩხრეკას მხოლოდ კომპანიის ერთი წარმომადგენელი ესწრება.
იმ დროს როცა პოლიცია პავილიონში შევიდა რეკლამის გადაღება მიმდინარეობდა. თვითმხილველები აცხადებენ, რომ რეკლამაში 15-მდე ბავშვი მონაწილეობდა. სხვა დეტალები უცნობია.
სარეკლამო კომპანია “ლიმონის” დამფუძნებელი გიორგი ოკმელაშვილი სავარაუდოდ დაკავებულია. როგორც სოციალურ ქსელში მისი ოჯახის წევრი წერს, ჩხრეკა მიმდინარეობს ოკმელაშვილის სახლშიც. ის ვარაუდობს, რომ საპოლიციო მოქმედებები ანტირუსულ აქციებში მონაწილეობას უკავშირდება:
“ჩემი სიძე გიორგი ოკმელაშვილი აიყვანეს. ახლა მის სამსახურში და სახლში ჩხრეკა მიმდინარეობს.
ვნახოთ რას გვედავებიან, აქციაზე ჯანსაღი აზრის და პროტესტის გამოხატვის გარდა !!!
ყველასთან მოვლენ სავარაუდოდ!
ახალგაზრდა იურისტთა ასოციაციას შევეხმიანეთ”– წერს გიორგი ჩხეიძე
კომენტარები