ჩინეთის პრეზიდენტი კრემლში და ჩინეთის ბრალდება ორმაგ სტანდარტში ჰააგას

ჩინეთის პრეზიდენტი სი ძინპინი მოსკოვში ოფიციალური ვიზიტით ჩავიდა. ამის შესახებ ინფორმაციას რუსული მედია ავრცელებს.

ჩინეთის პრეზიდენტის თვითმფრინავი ქალაქ მოსკოვში “ვნუკოვოს” საერთაშორისო აეროპორტში დაჯდა.

რუსეთის პრეზიდენტის პრეს-სპიკერის, დიმიტრი პესკოვის განცხადებით, ვლადიმერ პუტინისა და სი ძინპინის შეხვედრა კრემლში, ადგილობრივი დროით, 3 საათზე დაიწყება.

ეს არის პირველი შემთხვევა, როდესაც ჩინეთის ლიდერი ეწვია რუსეთს, ომის დაწყების შემდეგ.

ვიზიტი 3 დღის განმავლობაში, 20 მარტიდან 22 მარტის ჩათვლით გაგრძელდება.

პარალელურად, ჩინეთის საგარეო საქმეთა სამინისტრომ ჰააგის სისხლის სამართლის საერთაშორისო სასამართლოს მოუწოდა, დაიჭიროს “მიუკერძოებელი პოზიცია” და “მოერიდოს პოლიტიზებასა და ორმაგ სტანდარტებს”.

განცხადება მას შემდეგ გავრცელდა, რაც ICC-მ ომის დანაშაულებზე რუსეთის პრეზიდენტის, ვლადიმერ პუტინის დაკავების ორდერი გასცა.

“სისხლის სამართლის საერთაშორისო სასამართლომ უნდა დაიკავოს ობიექტური და მიუკერძოებელი პოზიცია, პატივი სცეს სახელმწიფო მეთაურის იურისდიქციულ იმუნიტეტს საერთაშორისო სამართლის შესაბამისად, განახორციელოს თავისი ფუნქციები და უფლებამოსილებები კანონით, კეთილსინდისიერად განმარტოს და გამოიყენოს საერთაშორისო სამართალი და თავიდან აიცილოს პოლიტიზაცია და ორმაგი სტანდარტები”, – თქვა ჩინეთის საგარეო საქმეთა სამინისტროს სპიკერმა ვანგ ვენბინმა ჟურნალისტებთან გამართულ რეგულარულ ბრიფინგზე.

შეგახსენებთ, ჰააგის სისხლის სამართლის საერთაშორისო სასამართლომ 17 მარტს პუტინის დაპატიმრების ორდერი გასცა. პუტინს ბრალად ედება 2022 წელს რუსეთის უკრაინაში შეჭრის შემდეგ უკრაინიდან ბავშვების უკანონო დეპორტაცია. ორდერი გაიცა რუსეთის ბავშვთა საკითხების ომბუდსმენის, მარია ლვოვა-ბელოვას დაკავებაზეც.