შინაგან საქმეთა მინისტრის ყოფილი მოადგილე მერაბ მალანია შვილისათვის წარდგენილ ბრალდებას არ ეთანხმება და ამბობს, რომ დაკავება “აბსოლუტურად უკანონო“ იყო.
არ ვეთანხმები არც შეუტყობინებლობას და არც ამ დამძიმებულ მუხლს, სუსულელეა. არანაირი მტკიცებულებები, როგორც აღმოჩნდა, გამოძიებას არ აქვს, რაც შეეხება ჩემი შვილის დაკავებას – ეს არის სრული უკანონობა, მოხდა დაკავება ჩემი შვილის. გავლენებზე მინდა გითხრათ-რა გავლენაზეა საუბარი, ჩემი შვილი ისე დაიჭირეს, არც დამირეკეს, რომ ჩემი შვილის დაკავებას აპირებდნენ, ისე ჩაისვა პოლიციელმა მანქანაში, არც უთქვამს, რომ პოლიციელი იყო, სათევზოდ მიდიოდა ბავშვი და გაქცევას აპირებდაო. ანკესი ედო პატარა ჩანთაში. რას ვუკავშირებ და რეზონანსული საქმეა და ვერ გაუძლო წნეხს პროკურატურამ, საზოგადოების გარკვეული ნაწილის, ვისაც, პირდაპირ ვიტყვი რა, ჩემი შვილის სისხლი სწყურია. არცერთ ბრალდებულს არ იცნობდა, თვალით არ უნახავს არცერთი. ერთადერთი, ვისთანაც ჰქონდა რამდენიმე სატელეფონო ზარი, ცალმხრივი, გაბაშვილთან, ისიც იმიტომ, რომ ნიაკოს შეყვარებული იყო, ინსტაგრამზე მოძებნა და შენი ნომერი მინდა და როგორც ხდება…- ამბობს მალანია.
შეგახსენებთ, რომ გიორგი მალანიას ბრალი დაუმძიმეს – შსს-ს ყოფილი მაღალჩინოსნის შვილს გამოძიება არა დანაშაულის შეუტყობინებლობას, არამედ ჯგუფურად ჯანმრთელობის განზრახ მძიმე დაზიანებაში დახმარებას ედავება.
მალანიას ბრალის ოფიციალური დადგენილება ზაჰესის წინასწარი მოთავსების იზოლატორში გააცნეს. ბრალის წარდგენას ადვოკატთან ერთად მალანიას მამა, მერაბ მალანიაც ესწრებოდა.
პროკურატურა ამბობს, რომ ალექსანდრე გაბაშვილმა, გიორგი რიკაძემ და დემეტრე ჩიქოვანმა სწორედ გიორგი მალანიას დახმარებით (რომელიც გიგა ავალიანის მოსწავლე იყო) გაარკვიეს მისი სამუშაო და საცხოვრებელი ადგილის მისამართები, შეისწავლეს მისი სამუშაო გრაფიკი, რა გზით გადაადგილდებოდა სამსახურიდან სახლში. შეარჩიეს განზრახვის შესრულების ადგილი და დაიწყეს თვალთვალი.
გიორგი მალანიას ბრალდება საქართველოს სისხლის სამართლის კოდექსის 25, 117-ე მუხლის მე-3 ნაწილის ,,ლ’’ ქვეპუნქტით (ჯგუფურად ჯანმრთელობის განზრახ მძიმე დაზიანებაში დახმარება) წარედგინა, რაც სასჯელის სახედ და ზომად 13 წლამდე თავისუფლების აღკვეთას ითვალისწინებს.
კომენტარები