საქალაქო სასამართლოში, თბილისში მოკლული ახალგაზრდა მასწავლებლის, გიგა ავალიანის საქმეზე ჩანიშნული პროცესი 20 წუთში დასრულდა.
მოსამართლემ საგამოძიებო უწყების წარმომადგენელს დაუკმაყოფილა შუამდგომლობა და ახლადგამოვლენილი მტკიცებულების სახით, საქმეს კომისიური ექსპერტიზის დასკვნა დაურთო.
სამედიცინო ექსპერტებმა გიგა ავალიანის სხეულზე მიყენებული დაზიანების კვალი კიდევ ერთხელ შეაფასეს. დასკვნაში წერია, რომ ის შუბლის არეში მძიმე, ბლაგვი საგნის ჩარტყმის შედეგად დაიღუპა.
ცნობისთვის, პროკურატურა კარგა ხანს ამტკივებდა, რომ მხოლოდ ხელის დარტმით მიიღო ავალიანმა დაზიანებები, კერძოდ, კი, “ქალა-ტვინის დახურული ბლაგვი ტრავმა, მარჯვნივ შუბლის ძვლის სრული მოტეხილობით“. პროკურატურა აცხადებდა, რომ არსებობს ვიდეო, რომელიც თავდასხმას ასახავს, თუმცა, თავდაპირველად, არ ამბობდა, რომ ვიდეო არაა სრული და მხოლოდ ნაწილია მასზე ასახული, პირიქით, მტკიცებით ფორმაში აცხადებდა, რომ ხელის ერთი დარტყმით შეიძლება მოზარდმა ადამიანს თავის ყველაზე მსხვილი, შუბლის ძვალი ჩაუმსხვრიოს, თან ისე, რომ ხელი, რომელიც დაარტყა, არ ჰქონდეს დაზიანებული, გამომდინარე იქედან, რომ ხელის ძვალი ბევრად მყიფეა, ვიდრე შუბლის. მოგვიანებით, ვითარდებოდა ვერსია, რომ გიგა ავალიანი წაიქცა და კეფა დაარტყა, თუმცა, პროკურატურა ვერ ხსნიდა, როგორ გაუტყდა ავალიანს შუბლის ძვალი, კეფის დარტყმით. ავალიანის დედა კი ამტკიცებს, რომ საგამოძიებო მოქმედებების დასრულების შემდეგ, თავად იპოვა სისხლიანი ქვა შემთხვევის ადგილთან და თავად წარადგინა გამოძიებასთან.
დღეს საქმის პროკურორი ამტკიცებს, რომ მტკიცებულებების მოპოვება, სასამართლო პროცესების პარალელურად გრძელდება.
“ბრალდების მხარემ წარადგინა მტკიცებულებები, მათ შორის იყო კომისიური სამედიცინო ექსპერტიზის დასკვნა, რომელსაც შემდგომ პროცესებზე გამოვიკვლევთ და მოხდა ამ მტკიცებულების დასაშვებად ცნობა.
განვმარტავ, რომ აღნიშნული საქმიდან გამოყოფილი არის საქმე გამოძიების ფარგლებში და ჩატარებულია ასეულობით საგამოძიებო მოქმედება, მიმდინარეობს მტკიცებულებების მოპოვება, მტკიცებულების შეფასების შემდეგ მიღებული იქნება გადაწყვეტილება [ბრალის დამძიმებასთან დაკავშირებით]. ყველა მიმართულებით მიმდინარეობს აქტიურად საგამოძიებო მოქმედებები, აქტიურად ვართ თანამშრომლობაში დაზარალებულის უფლებამონაცვლესთან და შესაბამისად ხდება ინფორმაციის და მტკიცებულებების მოპოვება,” – განაცხადა პროკურორმა, ლევან ვეფხვაძემ.
ცნობისთვის, მანამდე გიგა ავალიანის მკვლელობის საქმეზე დაკავებული ოთხი არასრულწლოვანიდან ორს – დ.ჩ.-სა და ა.ნ.-ს ბრალდება დაუმძიმდათ. აქამდე მათ დანაშაულის შეუტყობინებლობას ედავებოდნენ. დამძიმებული ბრალდება, რომელიც განზრახ მძიმე დაზიანების ჯგუფურად მომზადებას გულისხმობს, 9-დან 13 წლამდე პატიმრობას ითვალისწინებს.
კომენტარები