საქართველოს პრემიერმინისტრი, ირაკლი ღარიბაშვილი ბიჭვინთაში მიმდინარე მოვლენებს დღეს პირველად გამოეხმაურა და თქვა, რომ ამ თემაზე “ზედმეტი აჟიოტაჟი” არ უნდა ავტეხოთ:
“”მინდა შეგახსენოთ ყველას, არა თუ მხოლოდ ბიჭვინთა, არამედ აფხაზეთი, ჩვენი ძირძველი ისტორიული ტერიტორია და სამაჩაბლო, ცხინვალის რეგიონი არის დროებით ოკუპირებული რუსეთის მხრიდან. შესაბამისად, რა თქმა უნდა, მე მოვუწოდებდი ჩვენ პოლიტიკოსებს, რომ ზედმეტი აჟიოტაჟი არ უნდა ავტეხოთ, მე მათ შევახსენებდი, რომ სწორედ მათი უგნური პოლიტიკის შედეგია, რომ კოდორის ხეობა დავკარგეთ ჩვენ, რომელსაც არავითარი შემხებლობა არ ჰქონდა ამ კონფლიქტთან და ასზე მეტი სოფელი. ჩვენ ჩვენი გონივრული პოლიტიკით, ვაკეთებთ იმას, რომ ქვეყანაში არის შენარჩუნებული სიმშვიდე, სიწყნარე, სტაბილურობა და ჩვენ ჩვენი ასეთივე გონივრული პოლიტიკით ჩვენ ქვეყანას გავაერთიანებთ”.
ცნობისთვის, მოსკოვში აფხაზეთის დე ფაქტო პრეზიდენტმა გააფორმა შეთანხმება, რომლის მიხედვითაც, დროებით ოკუპირებულ აფხაზეთში ბიჭვინთის ტერიტორიის 186 ჰექტარი მიწა და 115 ჰექტარი საზღვაო სივრცე რუსეთის მფლობელობაში გადადის.
შეგახსენებთ, ბიჭვინთაში მიმდინარე მოვლენებს პრეზიდენტმა, სალომე ზურაბიშვილმა უკვე უწოდა ანექსია.
ოკუპაცია რომელიმე სახელმწიფოს შეიარაღებული ძალების მიერ სხვა ქვეყნის ტერიტორიის დროებით დაკავება. ოკუპაცია უნდა გავმიჯნოთ ანექსიისაგან, რომელიც ერთი სახელმწიფოს მიერ სხვა ქვეყნის სრულ ან ტერიტორიის ნაწილის ძალით მიერთებას გულისხმობს.
შეუძლია, თუ არა, პრემიერს ანექსიის განსხვავება ოკუპაციისგან – უცნობია, რადგან, ის არც კი ახსენებს ანექსიას.
ისევე, როგორც, არ ამბობს, რას ნიშნავს ზედმეტი აჟიოტაჟი – რამდენი აჟიოტაჟია ნორმა და რამდენი ზედმეტი და როგორ, რა ხერხებით შეიძლება განისაზღვროს ერთი მეორესგან და ვინ განსაზღვრავს? პრემიერი არც იმას ამბობს, თუ ჩვენ არ ვიხმაურებთ, ჩვენი მიწის სრულად მითვისებაზე, მაშ, ამას ჩვენ ნაცვლად ვინ გააკეთებს?
“რასაც ბიჭვინთაში ვხედავთ, ეს რუსეთის მიერ საქართველოს ტერიტორიის ანექსიაა” – პრეზიდენტი
კომენტარები