ბევრი შეცდომა დავუშვით, პორშეს გათამაშებაც შეცდომა იყო – ხვიჩია

გირჩის ერთ-ერთი ლიდერი, იაგო ხვიჩია, “რუსთავი2”-თან ამბობს:

“პორშეს გათამაშებაც შეცდომა იყო, ზოგადად, არასწორი დაპირება იყო, როგორც ასეთი, მაგრამ დაპირება ჩვენ გადაჭარბებით უნდა შეგვესრულებინა და შევასრულეთ. შეცდომა იყო, თუნდაც იმიტომ, რომ ჩვენ არ ვართ ლატარიის კომპანია პირობითად და ამ ფაქტმა, ზოგადად, გამოიწვია სხვა ადამიანების უარყოფითი რეაქციაც, სავარაუდოდ და ფაქტია, რომ შედეგები როდესაც ასეთია, ყველა პროექტი, რომელსაც არ უნდა აკეთებდე, თუ პროექტის შინაარსი არა, მისი ფორმები მაინც უნდა დააყენო კითხვის ნიშნის ქვეშ.

მე მგონი, ბევრი შეცდომა დავუშვით, როგორც ჩანს და უნდა გადავიაზროთ სხვანაირად მთელი პროცესი, რასაც ვაკეთებდით და ვფიქრობ, რომ ეს წარუმატებლობა რაღაცნაირი შანსია იმის, რომ ყველაფერი დავაყენოთ კითხვის ნიშნის ქვეშ საერთოდ, რასაც ვაკეთებდით და ასეთი განწყობით დავიწყოთ ახალი პროექტი.

ახლა რასაც ვფიქრობ, ამ წუთის მოცემულობით, არის ის, რომ ზედმეტად ავყევით მედია მეინსტრიმს და ზედმეტად დავინტერესდით იმ თემებით, რომელიც ხდებოდა ქვეყანაში, მედიის აზრით და ამით ავცდით რეალობას”