“ბევრი რამ არ იცით და ამიტომ, გთავაზობთ…” – ცესკოს პასუხი ფადი ასლის

ბიზნესმენ ფადი ასლის განცხადებას, ცენტრალური საარჩევნო კომისია ეხმაურება და წერს:

ბატონო ფადი ასლი, როგორც სოციალურ ქსელში გავრცელებული განცხადებიდან იკითხება, თქვენთვის აშკარად არ არის ცნობილი კონკრეტულად როგორ და რა სისტემით ჩატარდება ელექტრონული არჩევნები საქართველოში:

პირველ რიგში, არ იცით ის, რომ ქართული სისტემა არ არის დაფუძნებული ინტერნეტის ქსელზე და შესაბამისად კიბერ ჩარევისგან დაცულია;

არ იცით, რომ საქართველოში ყველა ტექნოლოგიური პროცესი ქაღალდის კვალით არის გადამოწმებადი, ტრადიციული მეთოდები, რომელიც თქვენივე სიტყვებით შეუძლებელს ხდის ფართომასშტაბიან მანიპულაციებს, სრულად არის შენარჩუნებული ქაღალდის ბიულეტენების სახით; კანონმდებლობით, არჩევნების საბოლოო შედეგი კი მხოლოდ ხელით დათვლის შემდეგ იქნება დადასტურებული;

არ იცით, რომ ასევე შენარჩუნებულია მარკირების პროცედურა და კენჭისყრის შემდგომ პერიოდში შემთხვევით შერჩეული უბნების გადათვლის პრაქტიკა, რაც დაზღვევის ორმაგ და სამმაგ მექანიზმებს ქმნის;

არ იცით, რომ საქართველოს საარჩევნო ადმინისტრაციას პარტნიორობასა და მხარდაჭერას საერთაშორისო კომპანია „სმარტმატიკი“ უწევს, რომელიც გლობალური ლიდერია საარჩევნო ინდუსტრიაში და 30-ზე მეტ ქვეყანაში აქვს 115-ზე მეტი არჩევნების მოდერნიზების გამოცდილება;

არ იცით, რომ ამერიკულმა კომპანიამ აუდიტი ჩაატარა და დაადასტურა, რომ ტექნოლოგია უმაღლესი საერთაშორისო სტანდარტისაა;

არ იცით, რომ ამავე აუდიტის დასკვნაში „წყაროს კოდთან“ დაკავშირებით ნათქვამია შემდეგი: „წყაროს კოდის მიმოხილვის დასრულების შემდეგ, PRO V&V-ს არ აქვს ღია ან გაურკვეველი საკითხები. მოწოდებული საწყისი კოდი დაიწერა ისე, რომ შეესაბამება კოდირების საუკეთესო პრაქტიკას“;

არ იცით, რომ აუდიტის დასკვნის თანახმად ჩვენთან გამოყენებული ელექტრონული საარჩევნო სისტემა სრულ შესაბამისობაშია საერთაშორისო პრინციპებთან, ადგილობრივ კანონმდებლობასთან, გამოყენებული აპარატურა და პროგრამული უზრუნველყოფა აკმაყოფილებს ტექნიკურ სპეციფიკაციებს, მათ შორის, ყველა მოთხოვნას ჩამოთვლილი კომპონენტების ნაწილში:

საყოველთაო ხმის უფლება;

თანაბარი ხმის უფლება;

თავისუფალი ხმის უფლება;

ხმის მიცემის ფარულობა;

მარეგულირებელი და ორგანიზაციული მოთხოვნები;

გამჭვირვალობა და დაკვირვება.

როგორც თქვენი ფეისბუქ სტატუსიდან ჩანს, საქართველოში ჩასატარებელ ელექტრონულ არჩევნებზე თქვენ კიდევ ბევრი რამ არ იცით და შესაბამისად თქვენს აუდიტორიას არასწორ ინფორმაციას აწვდით, რითაც არასწორი აღქმების ჩამოყალიბებასა და საარჩევნო გარემო დაზიანებას უწყობთ ხელს. ამიტომ, გთავაზობთ ჩვენი სასწავლო ვიდეოების და სხვა საინფორმაციო მასალების ბმულებს.

https://cesko.ge/ge/parlamentis-archevnebi-2024-hid

https://game.cec.gov.ge/

მათი გაცნობის შემდეგ, მზად ვართ, სურვილის შემთხვევაში, საარჩევნო ადმინისტრაციის ნებისმიერი საკომუნიკაციო არხით (სოციალური ქსელი, კონტაქტ ჰაბი თუ სხვა) მოგაწოდოთ ობიექტური და დაზუსტებული ინფორმაცია.

აქვე გაცნობებთ, რომ ქვეყნის მასშტაბით, შსს მომსახურების სააგენტოებში და იუსტიციის სახლებში (40-მდე ლოკაციაზე), მეტროსადგურებში (20 ლოკაციაზე), განთავსებულია ახალი ტექნოლოგიები, რომელთა გამოყენებითაც ხორციელდება საჯარო დემონსტრაციები და ჩვენი კოლეგები დაინტერესებულ ამომრჩევლებს აწვდიან დეტალურ ინფორმაციას. შესაბამისად, თქვენი დაინტერესების შემთხვევაში, შეგიძლიათ მიბრძანდეთ ხსენებულ ლოკაციებზე და მიიღოთ დეტალური ინფორმაცია აპარატების გამოყენების შესახებ და ამავდროულად გქონდეთ შესაძლებლობა, თავად გამოცადოთ აპარატები პრაქტიკაში.

„მიზეზები, თუ რატომ არ უნდა ენდოთ ელექტრონულ ხმის მიცემას საქართველოში!“ – ფადი ასლი