„იმ რესურსით, რომელიც გაგვაჩნია, მაქსიმუმს ვაკეთებთ, რათა ამ მძიმე სიტუაციაში ჩვენს თანამოქალაქეებს შევუმსუბუქოთ ყოფა და რაც შეიძლება დავეხმაროთ გამოწვევასთან გამკლავებაში”, – ამის შესახებ საქართველოს საგარეო საქმეთა მინისტრმა, დავით ზალკალიანმა განაცხადა.
მისი თქმით, ერთ-ერთი ყველაზე მნიშვნელოვანი პრობლემა არის საჰაერო მიმოსვლის შეზღუდვები, რომლებიც მთელი მსოფლიოს მასშტაბით ვრცელდება. მინისტრმა უახლოეს დღეებში დაგეგმილ სპეციალურ ავიარეისებზე ისაუბრა, რომელითაც ქვეყანაში საქართველოს მოქალაქეებს ჩამოიყვანენ.
“უახლოეს დღეებში განხორციელდება ჩარტერული რეისები. ამსტერდამიდან ორი რეისი და ერთი რეისი ბერლინიდან. რაც შეეხება დანარჩენ მიმართულებებს, ჩვენ გვაქვს ძალიან მჭიდრო კომუნიკაცია და კოორდინაცია ეკონომიკის სამინისტროსთან ერთად ავიაკომპანია „ჯორჯიან ეარვეისთან“ და მოვახდენთ სხვა მიმართულებებითაც ფრენებს. ის ადამიანები, რომლებიც იმყოფებიან ევროპის სხვადასხვა დედაქალაქებში, მათაც ეტაპობრივად, არსებული რესურსის ფარგლებში, რაც ხელისუფლებას და ქვეყანას გააჩნია, მოვახდენთ მათ გამოყვანას ამ ქალაქებიდანაც“, – განაცხადა დავით ზალკალიანმა.
დღეს საქართველომ საჰაერო მიმოსვლა სრულად შეწყვიტა. საგარეო საქმეთა სამინისტრო პრემიერ-მინისტრთან შექმნილი საკოორდინაციო საბჭოს დავალების შესაბამისად, გადასულია 24 საათიან სამუშაო რეჟიმზე.
კომენტარები