“ბავშვებს ძალიან მსუბუქად გადააქვთ – ისინი ისევ რჩებიან დაბალი რისკის ჯგუფში”

საქართველოში კორონავირუსის სტატისტიკაზე საუბარი ამ ეტაპზე ნაადრევია. ამის შესახებ უწყებათაშორისი საკოორდინაციო საბჭოს სხდომის შემდეგ გამართულ ბრიფინგზე, დაავადებათა კონტროლისა და საზოგადოებრივი ჯანმრთელობის ეროვნული ცენტრის დირექტორის მოადგილე პაატა იმნაძემ განაცხადა. მან ასევე აღნიშნა, რომ ბავშვები შესაძლოა ინფექციის გავრცელების დამატებითი წყარო გახდნენ უფროსი თაობისთვის.

„სტატისტიკაზე ლაპარაკი, როდესაც შემთხვევების რაოდენობა 40-იც არ არის ქვეყანაში, ამ დროს რაიმე სტატისტიკაზე ლაპარაკი უბრალოდ არასერიოზულია. როდესაც ჩინეთმა გამოაქვეყნა სტატისტიკა 75 ათას შემთხვევაზე, აქედან შეიძლება გამოიყვანო სტატისტიკა. ჯერჯერობით ბავშვები ისევ რჩებიან, საბედნიეროდ, როგორც დაბალი რისკის მქონე დაავადების მიმღებლობის ჯგუფში, ასევე განსაკუთრებით დაავადების სიმძიმესთან დაკავშირებით. თუმცა ბავშვები რისკს წარმოადგენენ დაავადების გავრცელებასთან დაკავშირებით, რადგან მათ თვითონ ძალიან მსუბუქად გადააქვთ, ამიტომ ისინი შეიძლება იყვნენ დამატებითი წყარო გავრცელების იგივე ბაბუებისა და ბებიებისთვის“, – აღნიშნა დაავადებათა კონტროლის ცენტრის დირექტორის მოადგილემ.

ჟურნალისტების კითხვაზე, თუ როდის შეიძლება ველოდოთ ქვეყანაში ვირუსის შიდა გავრცელებას, იმნაძემ შემდეგი პასუხი გასცა:

„ნოსტრადამუსი ნამდვილად არ ვარ და არც ვანგა. აქედან გამომდინარე, ქვეყანაში ყველაფერი იმის მიხედვით გაკეთდება, რაც იქნება მოსალოდნელი ასეთ სიტუაციაში“, – განაცხადა იმნაძემ.